________________
ज्ञाताधर्मकथा
४१
तए णं तेयलिपुत्ते जेणेव सए गिहे तेणेव उवागच्छड् । जा वि य से बाहिरिया परिसा भवइ, तंजहा- दासे इ वा पेसे इ वा भाइल्लए इ वा, सा वि य णं णो आढाइ णो परियाणाइ णो अब्भुढेइ जा वि य से अभिंतरिया परिसा भवइ, तंजहा- पिया इ वा माया इ वा भाया इ वा भगिणी इ वा भज्जा इ वा पुत्ता इ वा धूया इ वा सुण्हा इ वा, सा वि य णं णो आढाइ णो परियाणाइ णो अब्भुढेइ । तए णं से ते ते जेणेव वासघरे जेणेव सए सयणिज्जे तेणेव उवागच्छड़, उवागच्छित्ता सयणिज्जसि णिसीयइ, णिसीइत्ता एवं वयासी- “एवं खलु अहं सयाओ गिहाओ णिग्गच्छामि तं चेव जाव अभिंतरिया परिसा णो आढाइ णो परियाणाइ णो अब्भुढेइ । तं सेयं खलु मम अप्पाणं जीवियाओ ववरोवित्तए" त्ति कट्ट एवं संपेहेइ, संपेहित्ता तालउडं विसं आसगंसि पक्खिवइ । से य विसे णो संकमइ ।। तए णं से तेयलिपुत्ते णीलुप्पल गवल-गुलिय-अयसिकुसुमप्पगासं खुरधारं असिं खंधे
ओहरइ । तत्थ वि य से धारा ओपल्ला | तए णं से तेयलिपुत्ते जेणेव असोगवणिया तेणेव उवागच्छइ, उवागच्छित्ता पासगं गीवाए बंधइ, बंधित्ता रुक्खं दुरुहइ, दुरुहित्ता पास रुक्खे बंधइ, बंधित्ता अप्पाणं मुयइ । तत्थ वि य से रज्जू छिण्णा। तए णं से तेयलिपुत्ते महइ महालियं सिलं गीवाए बंधइ, बंधित्ता अत्थाहमतारम- पोरि सियंसि उदगंसि अप्पाणं मुयइ । तत्थ वि से थाहे जाए । तए णं से तेयलिपुत्ते सुक्कंसि तणकूडंसि अगणिकायं पक्खिवइ, पक्खिवित्ता अप्पाणं मुयइ । तत्थ वि य से अगणिकाए विज्झाए । तए णं से तेयलिपुत्ते एवं वयासी- सद्धेयं खलु भो ! समणा वयंति । सद्धेयं खलु भो ! माहणा वयंति । सद्धेयं खलु भो ! समणा माहणा वयंति । अहं एगो असद्धेयं वयामि । एवं खलु अहं सह पुत्तेहिं अपुत्ते, को मेदं सद्दहिस्सइ ? सह मित्तेहिं अमित्ते, को मेदं सद्दहिस्सइ ? एवं अत्थेणं, दारेणं, दासेहिं, पेसेहिं, परिजणेणं । एवं खलु तेयलिपुत्तेणं अमच्चेणं कणगज्झएणं रण्णा अवज्झाएणं समाणेणं तालपुडगे विसे आसगंसि पक्खित्ते, से वि य णो संकमड । को मेदं सद्दहिस्सइ ? तेयलिपत्तेणं णीलप्पल जाव खंधसि ओहरिए, तत्थ वि य से धारा ओपल्ला; को मेदं सद्दहिस्सइ ? तेयलिपुत्तेणं पासगं गीवाए बंधेत्ता जाव रज्जू छिण्णा; को मेदं सद्दहिस्सइ ? तेयलिपुत्तेणं महासिलयं गीवाए बंधित्ता अत्थाह जाव उदगंसि अप्पा मुक्के, तत्थ वि य णं थाहे जाए; को मेदं सद्दहिस्सइ ? तेयलिपुत्तेणं सुक्कंसि तणकूडे अग्गी विज्झाए, को मेदं सद्दहिस्सइ ? ओहयमणसंकप्पे जाव झियाइ ।
४५
144
