Page Text
________________
ज्ञाताधर्मकथा
संसारभउव्विग्गा जाव पव्वइत्तए | पडिच्छंतु णं देवाणुप्पिए! सिस्सिणिभिक्खं दलयामि । अहासुहं, मा पडिबंधं करेहि । तए णं सा पोट्टिला सुव्वयाहिं अज्जाहिं एवं वुत्ता समाणा हट्ठ-तुट्ठा उत्तरपुरित्थमं दिसिभागं अवक्कमइ, अवक्कमित्ता सयमेव आभरणमल्लालंकारं ओमयइ, ओमुइत्ता सयमेव पंचमुट्ठियं लोयं करेइ, करित्ता जेणेव सुव्वयाओ अज्जाओ तेणेव उवाच्छइ, उवागच्छित्ता वंदइ णमंसइ, वंदित्ता णमंसित्ता एवं वयासी- आलित्ते णं भंते ! लोए एवं जहा देवाणंदा जाव एक्कारस अंगाई अहिज्जइ, बहूणि वासाणि सामण्णपरियागं पाउणइ, पाउणित्ता मासियाए संलेहणाए अत्ताणं झोसित्ता सहिँ भत्ताई अणसणेणं छेइत्ता आलोइय पडिक्कंता समाहिपत्ता कालमासे कालं किच्चा अण्णयरेसु देवलोएसु देवत्ताए उववण्णा । तए णं से कणगरहे राया अण्णया कयाइ कालधम्मणा संजुत्ते यावि होत्था । तए णं राईसर जाव णीहरणं करेंति, करित्ता अण्णमण्णं एवं वयासी- एवं खलु देवाणुप्पिया! कणगरहे राया रज्जे य जाव पुत्ते वियंगित्था, अम्हे णं देवाणुप्पिया! रायाहीणा, रायाहिट्ठिया, रायाहीणकज्जा | अयं च णं तेतली अमच्चे कणगरहस्स रण्णो सव्वट्ठाणेसु सव्वभूमियासु लद्धपच्चए दिण्णवियारे सव्वकज्जवड्ढावए यावि होत्था । तं सेयं खलु अम्हं तेयलिपुत्तं अमच्चं कुमारं जाइत्तए त्ति कट्ट अण्णमण्णस्स एयमद्वं पडिसुणेति, पडिसुणित्ता जेणेव तेयलिपुत्ते अमच्चे तेणेव उवागच्छंति, उवागच्छित्ता तेयलिपुत्तं एवं वयासीएवं खलु देवाणुप्पिया! कणगरहे राया रज्जे य जाव वियंगेइ, अम्हे य णं देवाणुप्पिया! रायाहीणा रायाहिट्ठिया रायाहीणकज्जा । तुमं च णं देवाणुप्पिया ! कणगरहस्स रण्णो सव्वट्ठाणेसु जाव रज्जधुराचिंतए होत्था । तं जइ णं देवाणुप्पिया ! अत्थि केइ कुमारे रायलक्खणसंपण्णे अभिसेयारिहे, तं गं तुम अम्हं दलाहि, जा णं अम्हे महया रायाभिसेएणं अभिसिंचामो । तए णं तेयलिपुत्ते तेसिं ईसरपभिईणं एयमद्वं पडिसुणेइ, पडिसुणित्ता कणगज्झयं कुमारं ण्हायं जाव सस्सिरीयं करेइ, करित्ता तेसिं ईसरपभिईणं उवणेइ, उवणित्ता एवं वयासीएस णं देवाणुप्पिया ! कणगरहस्स रण्णो पुत्ते, पउमावईए देवीए अत्तए कणगज्झएणामं कुमारे अभिसेयारिहे रायलक्खणसंपण्णे, मए कणगरहस्स रण्णो रहस्सियं संवढिए | एयं णं तुब्भे महया-महया रायाभिसेएणं अभिसिंचह । सव्वं च से उट्ठाणपरियावणियं परिकहेइ। तए णं ते ईसरपभिइओ कणगज्झयं कुमारं महया-महया रायाभिसेएणं अभिसिंचंति तए णं से कणगज्झए कमारे राया जाए, महया हिमवंत-महंत- मलय -मंदर-महिंदसारे जाव रज्जं पसासेमाणे विहरइ ।
३४
142
| SR No. | 009906 |
| Book Title | Agam 06 Ang 06 Gnatadharma Sutra Mool Sthanakvasi |
| Original Sutra Author | Sudharmaswami |
| Author | Devardhigani Kshamashaman |
| Publisher | Global Jain Agam Mission |
| Publication Year | 2012 |
| Total Pages | 220 |
| Language | Prakrit |
| Classification | Book_Devnagari, Agam, Canon, & agam_gyatadharmkatha |
| File Size | 5 MB |