________________
ज्ञाताधर्मकथा
१३ तत्थ णं बहूणि आसणाणि य सयणायाणि य अत्थुयपच्चत्थयाइं चिट्ठति । तत्थ णं बहवे
णडा य णट्टा य जाव दिण्णभइ-भत्त-वेयणा तालायर-कम्मं करेमाणा विहरंति | रायगिहविणिग्गया एत्थ बहू जणा तेसु पुव्वण्णत्थेसु आसण-सयणेसु सण्णिसण्णा य संतुयट्टा य सुणमाणा य पेच्छमाणा य साहेमाणा य सुहंसुहेणं विहरइ । तए णं णंदे मणियारसेट्ठी दाहिणिल्ले वणसंडे एग महं महाणससालं कारावेइ, अणेगखंभसयसण्णिविढे जाव पडिरूवं । तत्थ णं बहवे पुरिसा दिण्ण-भइ-भत्त-वेयणा विउलं असणं पाणं खाइमं साइमं उवक्खडेंति, बहूणं समण माहण अतिहि किवण वणीमगाणं परिभाएमाणा-परिभाएमाणा विहरति । तए णं णंदे मणियारसेट्ठी पच्चत्थिमिल्ले वणसंडे एगं महं तेगिच्छियसालं कारेड, अणेगखंभसयसण्णिविढं जाव पडिरूवं । तत्थ णं बहवे वेज्जा य, वेज्जपुत्ता य, जाणुया य, जाणुयपुत्ता य, कुसला य, कुसलपुत्ता य, दिण्णभइ-भत्त-वेयणा बहूणं वाहियाणं, गिलाणाणं, रोगियाणं, दुब्बलाणं, तेइच्छं कम्मं करेमाणा-करेमाणा विहरंति | अण्णे य एत्थ बहवे पुरिसा दिण्ण-भइ- भत्त-वेयणा तेसिं बहूणं वाहियाणं, रोगियाणं, गिलाणाणं, दुब्बलाणं च ओसह- भेसज्ज-भत्तपाणेणं पडियारकम्मं करेमाणा-करेमाणा विहरंति । तए णं णंदे मणियारसेट्ठी उत्तरिल्ले वणसंडे एगं महं अलंकारियसभं कारेइ, अणेगखंभसयसण्णिविटुं जाव पडिरूवं । तत्थ णं बहवे अलंकारियपरिसा दिण्णभइ- भत्तवेयणा बहूणं समणाण य, माहणाण य अणाहाण य, गिलाणाण य, रोगियाण य, दुब्बलाण य अलंकारियकम्मं करेमाणा करेमाणा विहरति । तए णं तीए णंदाए पोक्खरिणीए बहवे सणाहा य अणाहा य पंथिया य पहिया य करोडिया य कप्पडिया य कारिया य तणाहारा य पत्तहारा य कट्ठहारा य; अप्पेगइया पहायंति, अप्पेगइया पाणियं पियंति, अप्पेगइया पाणियं संवहंति, अप्पेगइया विसज्जियसेयजल्लमल्ल- परिस्सम-णिद्द-खुप्पिवासा सुहंसुहेणं विहरंति । रायगिहविणिग्गओ वि जत्थ बहुजणो, किं ते ? जलरमण-विविहमज्जण- कयलि-लयाघरय कुसुमसत्थरय-अणेगसउणगण-रुयरिभियसंकुलेसु सुहंसुहेणं अभिरममाणो अभिरममाणो विहरइ। तए णं णंदाए पोक्खरिणीए बहुजणो ण्हायमाणो य, पीयमाणो य, पाणियं च संवहमाणो य अण्णमण्णं एवं वयासी- धण्णे णं देवाणुप्पिया ! णंदे मणियारसेट्ठी, कयत्थे जाव जम्मजीवियफले, जस्स णं इमेयारूवा गंदा पोक्खरिणी चाउक्कोणा जाव पडिरूवा, जस्स णं पुरथिमिल्ले तं चेव चउसु वि वणसंडेसु जाव रायगिहविणिग्गओ जत्थ बहुजणो आसणेसु
132
