Page Text
________________
ज्ञाताधर्मकथा
तए णं णंदे मणियारसेट्ठी अण्णया कयाइ गिम्हकालसमयंसि जेट्ठामूलंसि मासंसि अट्ठमभत्तं परिगेण्हइ, परिगेण्हित्ता पोसहसालाए पोसहिए इव बंभचारी उम्मुक्क मणिसुवण्णे ववगयमालावण्णग विलेवणे णिक्खित्त-सत्थ-मूसले एगे अबीए दब्भ संथारोवगए विहरइ । तए णं णंदस्स अट्ठमभत्तंसि परिणममाणंसि तण्हाए छुहाए य अभिभूयस्स समाणस्स इमेयारूवे अज्झत्थिए जाव समप्पज्जित्था- धण्णा णं ते ईसरपभियओ जाव कयविभवा णं ते ईसरपभियओ जेसिं णं रायगिहस्स बहिया बहूओ वावीओ पोक्खरिणीओ दीहियाओ गुंजालियाओ सरपंतियाओ सरसरपंतियाओ, जत्थ णं बहूजणो ण्हाइ य पियइ य पाणियं च संवहइ । तं सेयं खलु मम कल्लं पाउप्पभायाए सेणियं रायं आपुच्छित्ता रायगिहस्स णयरस्स बहिया उत्तरपुरच्छिमे दिसीभाए बेभारपव्वयस्स अदूरसामंते वत्थुपाढग-रोइयंसि भूमिभागंसि गंदं पोक्खरिणिं खणावेत्तए त्ति कट्ट एवं संपेहेइ, संपेहित्ता कल्लं पाउप्पभायाए जाव पोसहं पारेइ, पारित्ता प्रहाए जाव विभूसिए मित्त-णाइ जाव संपरिवडे महत्थं महग्घं महरिहं रायारिहं पाहुडं गेण्हइ, गेण्हित्ता जेणेव सेणिए राया तेणेव उवागच्छड़ जाव पाहुडं उवद्ववेइ, उवट्ठवित्ता एवं वयासी- इच्छामि णं सामी ! तुब्भेहिं अब्भणुण्णाए समाणे रायगिहस्स बहिया जाव खणावेत्तए। अहासुहं देवाणुप्पिया । तए णं णंदे सेणिएणं रण्णा अब्भणण्णाए समाणे हद्व-तुट्टे रायगिहं मज्झमज्झेणं णिग्गच्छइ, णिग्गछित्ता वत्थुपाढय-रोइयंसि भूमिभागंसि गंदं पोक्खरिणिं खणाविउं पयत्ते यावि होत्था । तए णं सा गंदा पोक्खरिणी अणुपुव्वेणं खणमाणा खणमाणा पोक्खरिणी जाया यावि होत्था- चाउक्कोणा समतीरा अणुपुव्व सुजायवप्पसीयलजला संछण्ण-पत्त-भिस-मणाला बहु - उप्पल - परम - कुमुय - णलिणी - सुभग - सोगंधिय - पुंडरीय - महापुंडरीय - सयपत्त-सहस्सपत्त-पप्फुल्लकेसरोववेयापरिहत्थ-भमंत-मत्तछप्पय-अणेग-सउणगण-मिहुणवियरिय-सढुण्णइय- महरसरणाइया पासाईया दरिसणिज्जा अभिरूवा पडिरूवा ।। तए णं से णंदे मणियारसेट्ठी णंदाए पोक्खरिणीए चउदिसिं चत्तारि वणसंडे रोवावेइ। तए णं ते वणसंडा अपव्वेणं सारक्खिज्जमाणा य संगोविज्जमाणा य संवढियमाणा य वणसंडा जाया- किण्हा जाव महामेह णिकुरंबभूया पत्तिया पुप्फिया जाव उवसोभेमाणाउवसोभेमाणा चिट्ठति । तए णं णंदे मणियारसेट्ठी पुरच्छिमिल्ले वणसंडे एगं महं चित्तसभं कारावेइ, अणेगखंभसयसंणिविटुं पासाईयं दरिसणिज्जं अभिरूवं पडिरूवं । तत्थ णं बहूणि किण्हाणि य जाव सक्किलाणी य कट्टकम्माणि य पोत्थकम्माणि य चित्त-लिप्प-गंथिम-वेढिमपूरिम- संघाइमाइं उवदंसिज्जमाणाइं उवदंसज्जिमाणाइं चिट्ठति ।
131
| SR No. | 009906 |
| Book Title | Agam 06 Ang 06 Gnatadharma Sutra Mool Sthanakvasi |
| Original Sutra Author | Sudharmaswami |
| Author | Devardhigani Kshamashaman |
| Publisher | Global Jain Agam Mission |
| Publication Year | 2012 |
| Total Pages | 220 |
| Language | Prakrit |
| Classification | Book_Devnagari, Agam, Canon, & agam_gyatadharmkatha |
| File Size | 5 MB |