________________
१०७
| १०८
१०९
११०
१११
११२
११३
११४
ज्ञाताधर्मकथा
तेणं कालेणं तेणं समएणं पंचाले नामं जणवए होत्था, वण्णओ । कंपिल्ले पुरे णयरे होत्था, वण्णओ । तत्थ णं जियसत्तू णामं राया होत्था पंचालाहिवई, वण्णओ । तस्स णं जियसत्तुस्स धारिणीपामोक्खं देविसहस्सं ओरोहे होत्था, वण्णओ ।
तत्थ णं मिहिलाए चोक्खा णामं परिव्वाइया रिउव्वेय जाव यावि होत्था । तए णं सा चोक्खा परिव्वाइया मिहिलाए बहूणं राईसर जाव सत्थवाहपभिईणं पुरओ दाणधम्मं च सोयधम्मं च तित्थाभिसेयं च आघवेमाणी पण्णवेमाणी परूवेमाणी उवदंसेमाणी विहरइ । तए णं सा चोक्खा परिव्वाइया अण्णया कयाइ तिदंडं च कुंडियं च जाव धाराओ गिण्हइ, गिण्हित्ता परिव्वाइगावसहाओ पडिणिक्खमइ, पडिणिक्खमित्ता पविरलपरिव्वाइया सद्धिं संपरिवुडा मिहिलं रायहाणिं मज्झमज्झेणं जेणेव कुंभगस्स रण्णो भवणे, जेणेव कण्णंतेउरे, जेणेव मल्ली विदेहरायवरकण्णा तेणेव उवागच्छइ, उवागच्छित्ता उदयपरिफासियाए, दब्भोवरि पच्चत्थुयाए भिसियाए णिसीयइ, णिसीइत्ता मल्लीए विदेहरायवरकण्णा पुरओ दाणधम्मं जाव विहरइ ।
तए णं सा मल्ली विदेहरायवरकण्णा चोक्खं परिव्वाइयं एवं वयासी - तुब्भे णं चोक्खे ! किंमूल धम्मे पत्ते ?
तए णं सा चोक्खा परिव्वाइया मल्लिं विदेहरायवरकण्णं एवं वयासी- अम्हं णं देवाणुप्पिया! सोयमूलए धम्मे पण्णवेमि, जं णं अम्हं किंचि असुई भवइ, तं णं उदएण य मट्टियाए य जाव अविग्घेणं सग्गं गच्छामो ।
तए णं मल्ली विदेहरायवरकण्णा चोक्खं परिव्वाइयं एवं वयासी- चोक्खा ! से जहाणाम केइ पुरिसे रुहिरकयं वत्थं रुहिरेण चेव धोवेज्जा, अत्थि णं चोक्खा! तस्स रुहिरकयस्स वत्थस्स रुहिरेणं धोव्वमाणस्स काई सोही ? णो इणट्ठे समट्ठे । एवामेव चोक्खा ! तुब्भेणं पाणाइवाएणं जाव मिच्छादंसणसल्लेणं णत्थि काई सोही, जहा व तस्स रुहिरकयस्स वत्थस्स रुहिरेणं धोव्वमाणस्स ।
तए णं सा चोक्खा परिव्वाइया मल्लीए विदेहरायवरकण्णाए एवं वुत्ता समाणा संकिया कंखिया विइगिच्छया भेयसमावण्णा जाया यावि होत्था, मल्लीए णो संचाएइ किंचिवि पामोक्खमाइक्खित्तए, तुसिणीया संचिट्ठइ ।
तए णं तं चोक्खं मल्लीए बहूओ दासचेडीओ हीलेंति, णिदंति, खिसंति, गरहंति, अप्पेगइयाओ, हेरुयालंति, अप्पेगइयाओ मुहमक्कडियाओ करेंति, अप्पेगइयाओ वग्घाडीओ करेंति, अप्पेगइयाओ तज्जेमाणीओ णिच्छुभंति ।
तए णं सा चोक्खा मल्लीए विदेहरायवरकण्णाए दासचेडियाहिं हीलिज्जमाणी जाव मिसमिसेमाणी मल्लीए विदेहरायवरकण्णाए पओसमावज्जइ, भिसियं गेण्हइ, गेण्हित्ता
100
