Page Text
________________
१०१
१०२
|१०३
१०४
१०५
१०६
ज्ञाताधर्मकथा
तए णं सा चित्तगर-सेणी इमीसे कहाए लद्धट्ठा समाणा जेणेव मल्लदिण्णे कुमारे तेणेव उवागच्छइ, उवागच्छित्ता करयल जाव वद्धावेइ, वद्धावित्ता एवं वयासी
एवं खलु सामी ! तस्स चित्तगरस्स इमेयारूवा चित्तगर-लद्धी लद्धा पत्ता अभिसमण्णागयाजस्स णं दुपयस्स वा जाव णिव्वत्तेइ । तं मा णं सामी ! तुब्भे तं चित्तगरं वज्झं आणवेह। तं तुब्भे णं सामी ! तस्स चित्तगरस्स अण्णं तयाणुरूवं दंडं णिव्वत्तेह |
तए णं से मल्लदिण्ण कुमारे तस्स चित्तगरस्स संडासगं छिंदावेइ, छिंदावित्ता णिव्विस आवे | तए णं से चित्तगरए मल्लदिण्णेणं णिव्विसए आणत्ते समाणे सभंडमत्तोवगरणमायाए मिहिलाओ णयरीओ णिक्खमइ, णिक्खमित्ता विदेहस्स जणवयस्स मज्झंमज्झेणं णिक्खमित्ता जेणेव कुरुजणवए, जेणेव हत्थिणाउरे णयरे, तेणेव उवागच्छइ, उवागच्छित्ता भंडणिक्खेवं करेइ, करित्ता चित्तफलगं सज्जेइ, सज्जित्ता मल्लीए विदेहरायवर-कण्णगाए पायंगुट्ठाणुसारेणं रूवं णिव्वत्तेइ, णिव्वत्तित्ता कक्खंतरंसि छुब्भइ, छुब्भइत्ता महत्थं जाव पाहुडं गेण्हइ, गेण्हित्ता हत्थिणाउरस्स णयरस्स मज्झंमज्झेणं जेणेव अदीणसत्तू राया तेणेव उवागच्छइ, उवागच्छित्ता करयल जाव वद्धावेइ, वद्धावित्ता पाहुडं उवणेइ, उवणित्ता एवं वयासी- एवं खलु अहं सामी ! महिलाओ रायहाणीओ कुंभगस्स रण्णो पुत्तेणं पभावईए देवीए अत्तएणं मल्लदिण्णेणं कुमारेणं णिव्विस आणत्ते समाणे इह हव्वमागए, तं इच्छामि णं सामी ! तुब्भं बाहुच्छाया परिग्गहिए जाव परिवसित्तए ।
तणं से अदीणसत्तू राया तं चित्तगरदारयं एवं वयासी- किं णं तुमं देवाणुप्पिया ! मल्लदिण्णेणं णिव्विसए आणत्ते ?'
तए णं से चित्तयरदारए अदीणसत्तुरायं एवं वयासी- एवं खलु सामी ! मल्लदिण्णे कुमारे अण्णया कयाइ चित्तगर-सेणिं सद्दावेइ, सद्दावित्ता एवं वयासी- तुब्भे णं देवाणुप्पिया! मम चित्तसभं, तं चेव सव्वं भाणियव्वं जाव मम संडासंग छिंदावेइ छिंदावित्ता णिव्विसयं आणवेइ । तं एवं खलु सामी ! मल्लदिण्णेणं कुमारेणं णिव्विसए आणत्ते ।
तए णं अदीणसत्तू राया तं चित्तगरं एवं वयासी - से केरिसए णं देवाणुप्पिया! तुमे मल्लीए तयाणुरूवे रूवे णिव्वत्तिए ?
तए णं से चित्तगरे कक्खंतराओ चित्तफलयं णीणेइ, णीणित्ता अदीणसत्तुस्स उवणे, उवणित्ता एवं वयासी- एस णं सामी ! मल्लीए विदेहरायवरकण्णाए तयाणुरुवस्स रूवस्स केइ आगार- भाव-पडोयारे णिव्वत्तिए । णो खलु सक्का केणइ देवेण वा जाव मल्ल विदेहरायवरकण्णगाए तयाणुरूवे रूवे णिव्वत्तित्तए ।
तणं अदीणसत्तू राया पडिरूवजणियहरिसे दूयं सद्दावेइ जाव पहारेत्थ गमणाए ।
99
| SR No. | 009906 |
| Book Title | Agam 06 Ang 06 Gnatadharma Sutra Mool Sthanakvasi |
| Original Sutra Author | Sudharmaswami |
| Author | Devardhigani Kshamashaman |
| Publisher | Global Jain Agam Mission |
| Publication Year | 2012 |
| Total Pages | 220 |
| Language | Prakrit |
| Classification | Book_Devnagari, Agam, Canon, & agam_gyatadharmkatha |
| File Size | 5 MB |