________________
९
ܘ
११
१३
१४
१५
भगवई सुत्त
अहक्खायसंजए णं भंते! कइविहे पण्णत्ते ? गोयमा ! दुविहे पण्णत्ते, तं जहा- छउमत्थे य केवल य ।
सामाइयम्मि उ कए, चाउज्जामं अणुत्तरं धम्मं ।
तिविहेणं फासयंतो, सामाइयसंजओ स खलु ॥१॥ छेत्तूण उ परियागं, पोराणं जो ठवेइ अप्पाणं । धम्मम्मि पंचजामे, छेओवट्ठावओ स खलु ॥२॥ परिहरइ जो विसुद्धं तु, पंचजामं अणुत्तरं धम्मं । तिविहेणं फासयंतो, परिहारिसंजओ स खलु ॥३॥ लोभाणू वेययंतो, जो खलु उवसामओ व खवओ वा । सो सुहुमसंपराओ, अहक्खाया उणओ किंचि ॥४॥
उवसंते खीणम्मि व, जो खलु कम्मम्मि मोहणिज्जम्मि । छउमत्थो व जिणो वा, अहक्खाओ संजओ स खलु ॥ ५ ॥
सामाइयसंजए णं भंते! किं सवेयए होज्जा अवेयए होज्जा ? गोयमा ! सवेयए वा होज्जा, अवेयए वा होज्जा । जइ सवेयए एवं जहा कसायकुसीले तहेव णिरवसेसं । एवं छे ओवट्ठावणियसंजए वि । परिहारविसुद्धियसंजओ जहा पुलाओ । सुहुमसंपरायसंजओ अहक्खायसंजओ य जहा णियंठो ।
सामाइयसंजए णं भंते! किं सरागे होज्जा, वीयरागे होज्जा ? गोयमा ! सरागे होज्जा, णो वीयरागे होज्जा। एवं जाव सुहुमसंपरायसंजए । अहक्खायसंजए जहा णियंठे।
सामाइयसंजए णं भंते! किं ठियकप्पे होज्जा, अट्ठियकप्पे होज्जा ? गोयमा ! ठियकप्पे वा होज्जा, अट्ठियकप्पे वा होज्जा ।
छेओवट्ठावणियसंजए णं भंते ! पुच्छा ? गोयमा ! ठियकप्पे होज्जा, णो अट्ठियकप्पे होज्जा । एवं परिहार-विसुद्धियसंजए वि । सेसा जहा सामाइयसंजए ।
सामाइयसंजए णं भंते! किं जिणकप्पे होज्जा, थेरकप्पे होज्जा, कप्पाईए होज्जा ? गोयमा ! जिणकप्पे वा होज्जा, जहा कसायकुसीले तहेव णिरवसेसं । छेओवट्ठावणिओ परिहारविसुद्धिओ य जहा बउसो, सेसा जहा णियंठे ।
सामाइयसंजए णं भंते ! किं पुलाए होज्जा, बउसे जाव सिणाए होज्जा ? गोयमा! पुलाए वा होज्जा, बउसे जाव कसायकुसीले वा होज्जा, णो णियंठे होज्जा, णो सिणाए होज्जा । एवं छे ओवट्ठावणिए वि ।
परिहारविसुद्धियसंजए णं भंते! पुच्छा ? गोयमा! णो पुलाए, णो बउसे, णो पडि- सेवणाकुसीले होज्जा, कसायकुसीले होज्जा, णो णियंठे होज्जा, णो सिणाए होज्जा । एवं सुहुमसंपराए वि । अहक्खायसंजए णं भंते ! पुच्छा ? गोयमा ! णो पुलाए होज्जा जाव णो कसायकुसीले होज्जा, णियंठे वा होज्जा, सिणाए वा होज्जा ।
582
