Page Text
________________
२३
भगवई सुत्त णवमगमए तहेव णिरवसेसं जाव कालादेसो त्ति, णवरं-परिमाणं जहा एयस्सेव तइयगमे, सेसं तं चेव । जड़ णं भंते ! सण्णिपंचिंदिय-तिरिक्खजोणिएहिंतो उववज्जंति-किं संखेज्जवासाउयसण्णिपंचिंदिय-तिरिक्खजोणिएहिंतो उववज्जति, असंखेज्जवासाउय-सण्णिपंचिंदिय- तिरिक्खजोणिएहिंतो उववज्जंति ? गोयमा ! संखेज्जवासाउय-सण्णिपंचिंदिय-तिरिक्खजोणिएहितो उववज्जंति, णो असंखेज्जवासाउय- सण्णिपंचिंदिय-तिरिक्खजोणिएहिंतो उववज्जंति । जड़ णं भंते ! संखेज्जवासाउय-सण्णिपंचिंदिय-तिरिक्खजोणिएहिंतो उववज्जंति-किं पज्जत्तसंखेज्जवासाउय-सण्णिपंचिंदिय-तिरिक्खजोणिएहिंतो उववज्जंति, अपज्जत्त-संखेज्जवासाउयसण्णिपंचिंदिय-तिरिक्खजोणिएहिंतो उववज्जति ? गोयमा ! दोस् वि उववज्जंति । संखेज्जवासाउयसण्णिपंचिंदियतिरिक्खजोणिए णं भंते! जे भविए पंचिंदिय-तिरिक्खजोणिएसु उववज्जित्तए, से णं भंते ! केवइय-काल-ठिईएसु उववज्जेज्जा? गोयमा! जहण्णेणं अंतोमुत्तठिईएसु, उक्कोसेणं तिपलिओवमद्विइएसु उववज्जेज्जा। ते णं भंते ! जीवा एग समएणं केवइया उववज्जंति ? गोयमा ! जहा एयस्स चेव सण्णिस्स रयणप्पभाए उववज्जमाणस्स पढमगमए, णवरं-ओगाहणा जहण्णेणं अंगुलस्स असंखेज्जइभागं, उक्कोसेणं जोयणसहस्सं । सेसं तं चेव जाव भवादेसो त्ति । कालदेसेणं जहण्णेणं दो अंतोमुहुत्ता, उक्कोसेणं तिण्णि पलिओवमाइं पुव्वकोडीपुहुत्तमब्भहियाई, जाव एवइयं कालं गइरागई करेज्जा। सो चेव जहण्णकालटिईएस उववण्णो एस चेव वत्तव्वया, णवरं-कालादेसेणं जहण्णेणं दो अंतोमुहुत्ता, उक्कोसेणं चत्तारि पुव्वकोडीओ चउहिं अंतोमुहुत्तेहिं अब्भहियाओ, जाव एवइयं कालं गइरागई करेज्जा । सो चेव उक्कोसकालट्ठिईएसु उववण्णो, जहण्णेणं तिपलिओवमट्टिईएसु, उक्कोसेण वि तिपलिओवमहिईएस उववज्जेज्जा, एस चेव वत्तव्वया, णवरं-परिमाणं जहण्णेणं एक्को वा दो वा तिण्णि वा, उक्कोसेणं संखेज्जा उववज्जंति । ओगाहणा जहण्णेणं अंगुलस्स असंखेज्जइभाग, उक्कोसेणं जोयणसहस्सं, सेसं तं चेव जाव अणुबंधो त्ति । भवादेसेणं दो भवग्गहणाइं । कालादेसेणं जहण्णेणं तिण्णि पलिओवमाइं अंतोमुत्त-मब्भहियाइं, उक्कोसेणं तिण्णि पलिओवमाइं पुव्वकोडीए अब्भहियाइं; जाव एवइयं कालं गइरागइं करेज्जा । सो चेव अप्पणा जहण्णकालट्ठिईओ जाओ, जहण्णेणं अंतोमुत्तठिईएसु, उक्कोसेणं पुव्वकोडीआउएसु उववज्जेज्जा । लद्धी से जहा एयस्स चेव सण्णिपचिंदियस्स पुढविक्काइएस् उववज्जमाणस्स मज्झिल्लएसु तिसु गमएसु सच्चेव इह वि मज्झिमेसु तिसु गमएसु कायव्वा। संवेहो जहेव एत्थ चेव असण्णिस्स मज्झिमेसु तिसु गमएसु । सो चेव अप्पणा उक्कोसकालट्टिईओ जाओ जहा पढमगमओ | णवरं- ठिई अणुबंधो जहण्णेणं पुव्वकोडी, उक्कोसेण वि पुव्वकोडी | कालादेसेणं जहण्णेणं पुव्वकोडी अंतोमुहुत्तमब्भहिया, उक्कोसेणं तिण्णि पलिओवमाइं पुव्वकोडीपुहुत्त- मब्भहियाइं; जाव एवइयं कालं गइरागई करेज्जा |
२८
531
| SR No. | 009905 |
| Book Title | Agam 05 Ang 05 Bhagvati Vyakhya Prajnapti Sutra Mool Sthanakvasi |
| Original Sutra Author | Sudharmaswami |
| Author | Devardhigani Kshamashaman |
| Publisher | Global Jain Agam Mission |
| Publication Year | 2012 |
| Total Pages | 653 |
| Language | Prakrit |
| Classification | Book_Devnagari, Agam, Canon, & agam_bhagwati |
| File Size | 8 MB |