________________
भगवई सुत्त २५ | एएसि णं भंते ! सिद्धाणं चुलसीइसमज्जियाणं णोचुलसीइसमज्जियाणं, चुलसीईए य
णोचुलसीईए य समज्जियाणं कयरे कयरे हितो अप्पावा जाव विसेसाहिया वा ? गोयमा ! सव्वत्थोवा सिद्धा चुलसीईए य णोचुलसीईए य समज्जिया, चुलसीईसमज्जिया अणंतगुणा, णोचुलसीइसमज्जिया अणंतगुणा | || सेवं भंते ! सेवं भंते ! ||
|| दसमो उद्देसो समत्तो || वीसइमं सतं समत्तं ॥
एगवीसइमं सतं
पढमो वग्गो
सालि कल अयसि वंसे, इक्खू दब्भे य अब्भ तुलसी य । अद्वेए दस वग्गा, असीइं पुण होति उद्देसा ॥ रायगिहे जाव एवं वयासी- अह भंते ! साली-वीही-गोधूम जाव जवजवाणं, एएसि णं भंते ! जे जीवा मूलत्ताए वक्कमंति ? ते णं भंते ! जीवा कओहिंतो उववज्जंति- किं णेरइएहितो उववज्जंति जाव देवेहिंतो उववज्जति ? । गोयमा ! जहा वक्कंतीए तहेव उववाओ, णवरं देववज्जं । ते णं भंते ! जीवा एगसमएणं केवइया उववज्जंति ? गोयमा ! जहण्णेणं एक्को वा दो वा तिण्णि वा, उक्कोसेणं संखेज्जा वा असंखेज्जा वा उववज्जंति । अवहारो जहा उप्पलुद्देसे । तेसि णं भंते ! जीवाणं केमहालिया सरीरोगाहणा पण्णत्ता ? गोयमा ! जहण्णेणं अंगुलस्स असंखेज्जइभागं, उक्कोसेणं धणुपुहुत्तं । ते णं भंते ! जीवा णाणावरणिज्जस्स कम्मस्स किं बंधगा, अबंधगा ? गोयमा ! जहा उप्पलुद्देसे। एवं वेए वि, उदीरणाए वि । ते णं भंते ! जीवा किं कण्हलेस्सा, पुच्छा ? गोयमा ! छव्वीसं भंगा, दिट्ठी जाव इंदिया जहा उप्पलुद्देसे । ते णं भंते ! साली-वीही-गोधूम जाव जवजवगमूलगजीवे त्ति कालओ केवचिरं होइ? गोयमा ! जहण्णेणं अंतोमुहुत्तं, उक्कोसेणं असंखेज्जं कालं । से णं भंते ! साली-वीही-गोधूम जाव जवजवगमूलगजीवे पुढवीजीवे, पुणरवि साली वीहीजाव जवजवगमूलगजीवे केवइयं कालं सेवेज्जा, केवइयं कालं गइरागई करिज्जा ? गोयमा ! जहा उप्पलुद्देसे । एएणं अभिलावेणं जाव मणुस्सजीवे । आहारो जहा उप्पलुद्देसे । ठिई जहण्णेणं अंतोमुहुत्तं, उक्कोसेणं वासपुहुत्तं । समुग्घाय-समोहया, उव्वदृणा य जहा उप्पलुद्देसे | अह भंते ! सव्वपाणा जाव सव्वसत्ता साली-वीही जाव जवजव-गमूलगजीवत्ताए उववण्णपुव्वा? हंता गोयमा ! असइं अदुवा अणंतखुत्तो । || सेवं भंते ! सेवं भंते ! ||
494
