Page Text
________________
४
५
Ιε
७
८
भगवई सुत्त
गोयमा ! णो इणट्ठे समट्ठे । बेइंदिया णं पत्तेयाहारा पत्तेयपरिणामा पत्तेयसरीरं बंधति, बंधित्ता तओ पच्छा आहारेंति वा परिणामेंति वा सरीरं वा बंधंति ।
तेसि णं भंते! जीवाणं कइ लेस्साओ पण्णत्ताओ ?
गोमा ! तओ लेस्साओ पण्णत्ताओ, तं जहा- कण्हलेस्सा, णीललेस्सा, काउलेस्सा। एवं जहा एगूणवीस मे सए तेउकाइयाणं जाव उव्वट्टंति । णवरं सम्मदिट्ठी वि मिच्छादिट्ठी वि, णो सम्मामिच्छादिट्ठी, दो णाणा, दो अण्णाणा णियमं, णो मणजोगी, वयजोगी वि, कायजोगी वि, आहारो नियमं छद्दिसिं ।
तेसि णं भंते ! जीवाणं एवं सण्णा इ वा पण्णा इ वा मणे इ वा वई इ वा -- अम्हे णं इट्ठाणिट्ठे रसे इट्ठाणिट्ठे फासे पडिसंवेएमो ?
गोयमा ! णो इणट्ठे समट्ठे, पडिसंवेदंति पुण ते । ठिई जहण्णेणं अंतोमुहुत्तं, उक्कोसेणं बारस संवच्छराइं । सेसं तं चेव, एवं तेइंदिया वि । एवं चउरिंदिया वि, णाणत्तं इंदिएसु, ठिईए य । सेसं तं चेव । ठिई जहा पण्णवणाए ।
सिय भंते! जाव चत्तारि पंच पंचिंदिया एगयओ साहारणं सरीरं बंधंति, पुच्छा?
गोयमा ! जहा बेइंदियाणं, णवरं छल्लेसाओ, दिट्ठी तिविहा वि, चत्तारि णाणा तिण्णि अण्णाणा भयणाए, तिविहो जोगो ।
तेसि णं भंते ! जीवाणं एवं सण्णा इ वा पण्णा इ वा मणे इ वा वई इ वा - अम्हे णं आहारमाहारेमो ?
गोयमा ! अत्थेगइयाणं एवं सण्णा इ वा पण्णा इ वा मणे इ वा वई इ वा अम्हे णं आहारमाहारेमो | अत्थेगइयाणं णो एवं सण्णा इ वा जाव वई इ वा अम्हे णं आहारमाहारेमो, आहारेंति पुण ते ।
तेसि णं भंते ! जीवाणं एवं सण्णा इ वा जाव वई इ वा अम्हे णं इट्ठाणिट्ठे सद्दे, इट्ठाणिट्टे रूवे, इट्ठाणिट्ठे गंधे, इट्ठाणिट्ठे रसे, इट्ठाणिट्टे फासे पडि-संवेदेमो ?
गोयमा ! अत्थेगइयाणं एवं सण्णा इ वा जाव वई इ वा अम्हे णं इट्ठाणिट्ठे सद्दे जाव इट्ठाणिट्ठे फासे पडिसंवेदेमो, अत्थेगइयाणं णो एवं सण्णा इ वा जाव वई इ वा अम्हे णं इट्ठाणिट्ठे सद्दे जाव इट्ठाणिट्ठे फासे पडिसंवेदेमो, पडिसंवेदेंति पुण ते I
ते णं भंते ! जीवा किं पाणाइवाए उवक्खाइज्जति, पुच्छा ?
गोयमा ! अत्थेगइया पाणाइवाए वि उवक्खाइज्जंति जाव मिच्छादंसण- सल्ले वि उवक्खाइज्जंति, अत्थेगइया णो पाणाइवाए उवक्खाइज्जंति जाव णो मिच्छादंसणसल्ले उवक्खाइज्जंति । जेसि पि णं जीवाणं ते जीवा एवमाहिज्जंति तेसिं पि णं जीवाणं अत्थेगइयाणं विण्णाए णाणत्ते, अत्थेगइयाणं णो विण्णाए णाणत्ते । उववाओ सव्वओ जाव सव्वट्ठसिद्धाओ, ठिई जहण्णेणं अंतोमुहुत्तं, उक्कोसेणं तेत्तीसं सागरोवमाइं । छस्समुग्घाया केवलिवज्जा, उव्वट्टणा सव्वत्थ गच्छंति जाव सव्वट्ठसिद्धे इ, सेसं जहा बेइंदियाणं ।
472
| SR No. | 009905 |
| Book Title | Agam 05 Ang 05 Bhagvati Vyakhya Prajnapti Sutra Mool Sthanakvasi |
| Original Sutra Author | Sudharmaswami |
| Author | Devardhigani Kshamashaman |
| Publisher | Global Jain Agam Mission |
| Publication Year | 2012 |
| Total Pages | 653 |
| Language | Prakrit |
| Classification | Book_Devnagari, Agam, Canon, & agam_bhagwati |
| File Size | 8 MB |