________________
भगवई सुत्त
गोयमा ! सिय एगवण्णे जाव सिय पंचवण्णे, सिय एगगंधे सिय दुगंधे, सिय एगरसे जाव सिय पंचरसे, सिय चउफासे जाव सिय अट्ठफासे पण्णत्ते || सेवं भंते ! सेवं भंते ! ||
॥ छट्ठो उद्देसो समत्ता ||
अट्ठारसमं सतं
सत्तमो उद्देसो
१
रायगिहे जाव एवं वयासी- अण्णउत्थिया णं भंते ! एवमाइक्खंति जाव पवेति- एवं खलु केवली जक्खाएसेणं आइढे समाणे आहच्च दो भासाओ भासइ, तं जहा- मोसं वा सच्चामोसं वा; से कहमेयं भंते ! एवं ? गोयमा ! जण्णं ते अण्णउत्थिया जाव जे ते एवमाहंसु मिच्छं ते एवमाहंसु; अहं पुण गोयमा ! एवमाइक्खामि, भासामि, पण्णवेमि, परूवेमि- णो खलु केवली जक्खाएसेणं आइट्ठइ, णो खल केवली जक्खाएसेणं आइढे समाणे आहच्च दो भासाओ भासइ, तं जहा- मोसं वा सच्चामोसं वा । केवली णं असावज्जाओ अपरोवघाइयाओ आहच्च दो भासाओ भासइ, तं जहा- सच्चं वा असच्चामोसं वा । कइविहे णं भंते ! उवही पण्णत्ते ? गोयमा ! तिविहे उवही पण्णत्ते, तं जहा- कम्मोवही, सरीरोवही, बाहिरभण्डमत्तोवगरणोवही । णेरइयाणं भंते ! पुच्छा ? गोयमा ! दुविहे उवही पण्णत्ते, तं जहा- कम्मोवही य सरीरोवही य । सेसाणं तिविहे उवही एगिंदियवज्जाणं जाव वेमाणियाणं । एगिंदियाणं दुविहे उवही पण्णत्ते, तं जहा- कम्मोवही य सरीरोवही य । कइविहे णं भंते ! उवही पण्णत्ते ? गोयमा ! तिविहे उवही पण्णत्ते, तं जहा- सच्चित्ते, अचित्ते, मीसए | एवं णेरइयाण वि, एवं णिरवसेसं जाव वेमाणियाणं । कइविहे णं भंते ! परिग्गहे पण्णत्ते ? गोयमा ! तिविहे परिग्गहे पण्णत्ते, तं जहाकम्मपरिग्गहे, सरीरपरिग्गहे, बाहिरगभंडमत्तोवगरणपरिग्गहे । णेरइयाणं भंते ! पुच्छा ? गोयमा ! जहा उवहिणा दो दंडगा भणिया तहा परिग्गहेणं वि दो दंडगा भाणियव्वा । कइविहे गं भंते ! पणिहाणे पण्णत्ते ? गोयमा ! तिविहे पणिहाणे पण्णत्ते, तं जहामणपणिहाणे, वइपणिहाणे, कायपणिहाणे । णेरइयाणं भंते ! कइविहे पणिहाणे पण्णत्ते ? गोयमा ! एवं चेव । एवं जाव पुढविकाइयाणं, पुच्छा ? गोयमा ! एगे कायपणिहाणे पण्णत्ते । एवं जाव वणस्सइकाइयाणं । बेइंदियाणं, पुच्छा ? गोयमा ! दुविहे पणिहाणे पण्णत्ते, तं जहा- वइपणिहाणे य कायपणिहाणे य। एवं जाव चरिंदियाणं । सेसाणं तिविहे वि जाव वेमाणियाणं ।
fI
450
