Page Text
________________
भगवई सुत्त
|
|
|
जीवा णं भंते ! किं धम्मे ठिया, अधम्मे ठिया, धम्माधम्मे ठिया ? गोयमा ! जीवा धम्मे वि ठिया, अधम्मे वि ठिया, धम्माधम्मे वि ठिया । णेरइयाणं भंते ! किं धम्मे ठिया, पुच्छा | गोयमा ! णेरड्या णो धम्मे ठिया, अधम्मे ठिया, णो धम्माधम्मे ठिया । एवं जाव चउरिंदियाणं । पंचिंदियतिरिक्खजोणियाणं भंते ! किं धम्मे ठिया, पुच्छा ? गोयमा ! पंचिंदियतिरिक्खजोणिया णो धम्मे ठिया, अधम्मे ठिया, धम्माधम्मे वि ठिया । मणुस्सा जहा जीवा | वाणमंतर-जोइसिय-वेमाणिया जहा णेरइया | अण्णउत्थिया णं भंते ! एवं आइक्खंति जाव परूवेंति- एवं खलु समणा पंडिया, समणोवासया बालपंडिया, जस्स णं एगपाणाए वि दंडे अणिक्खित्ते से णं एगंतबाले त्ति वत्तव्वं सिया, से कहमेय भंते ! एवं ? गोयमा ! जण्णं ते अण्णउत्थिया एवं आइक्खंति जाव वत्तव्वं सिया; जे ते एवं आहंसु मिच्छं ते एवं आहेसु । अहं पुण गोयमा ! एवं आइक्खामि जाव परूवेमि- एवं खलु समणा पंडिया, समणोवासगा बालपंडिया, जस्स णं एगपाणाए वि दंडे णिक्खित्ते से णं णो एगंतबाले त्ति वत्तव्वं सिया | जीवा णं भंते ! किं बाला, पंडिया, बालपंडिया ? गोयमा ! बाला वि, पंडिया वि, बालपंडिया वि | णेरइयाणं भंते ! किं बाला, पुच्छा ? गोयमा ! णेरड्या बाला, णो पंडिया, णो बालपंडिया । एवं जाव चउरिंदियाणं । पंचिंदियतिरिक्खजोणिया णं भंते ! किं बाला, पृच्छा ? गोयमा ! पंचिंदिय-तिरिक्ख-जोणिया बाला, णो पंडिया, बालपंडिया वि । मणुस्सा जहा जीवा। वाणमंतर-जोइसिय-वेमाणिया जहा णेरइया । अण्णउत्थिया णं भंते ! एवं आइक्खंति जाव परूवेंति- एवं खलु पाणाइवाए, मुसावाए जाव मिच्छादसणसल्ले वट्टमाणस्स अण्णे जीवे, अण्णे जीवाया, पाणाइवायवेरमणे जाव परिग्गहवेरमणे, कोहविवेगे जाव मिच्छादसणसल्लविवेगे वट्टमाणस्स अण्णे जीवे, अण्णे जीवाया; उप्पत्तियाए जाव परिणामियाए वट्टमाणस्स अण्णे जीवे, अण्णे जीवाया; उग्गहे, ईहा, अवाए, धारणाए वट्टमाणस्स अण्णे जीवे, अण्णे जीवाया; उठाणे जाव परक्कमे वट्टमाणस्स अण्णे जीवे, अण्णे जीवाया; णेरइयत्ते, तिरिक्ख-मणुस्स-देवत्ते वट्ट- माणस्स अण्णे जीवे, अण्णे जीवाया, णाणावरणिज्जे जाव अंतराइए वट्टमाणस्स अण्णे जीवे, अण्णे जीवाया; एवं कण्हलेस्साए जाव सुक्कलेस्साए; एवं सम्मदिट्ठिए, मिच्छादिट्ठीए सम्मामिच्छादिट्ठीए; एवं चक्खुदंसणे जाव केवलदंसणे, आभिणिबोहियणाणे जाव केवलणाणे एवं तिणि अण्णाणा; चत्तारि सण्णाओ; पंच सरीरा; तिण्णि जोगा; दो उवओगे जाव अणागारोवओगे वट्टमाणस्स अण्णे जीवे, अण्णे जीवाया; से कहमेयं भंते! एवं ?
430
| SR No. | 009905 |
| Book Title | Agam 05 Ang 05 Bhagvati Vyakhya Prajnapti Sutra Mool Sthanakvasi |
| Original Sutra Author | Sudharmaswami |
| Author | Devardhigani Kshamashaman |
| Publisher | Global Jain Agam Mission |
| Publication Year | 2012 |
| Total Pages | 653 |
| Language | Prakrit |
| Classification | Book_Devnagari, Agam, Canon, & agam_bhagwati |
| File Size | 8 MB |