Page Text
________________
भगवई सुत्त
तत्थेव तत्थेव भुज्जो-भुज्जो पच्चायाहिइ । सव्वत्थ वि णं सत्थवज्झे दाहवक्कंतीए कालमासे कालं किच्चा जाइं इमाइं भयपरिसप्पविहाणाई भवंति, तं जहा- गोहाणं, णउलाणं जहा पण्णवणाए जाव जाहगाणं, चउप्पाइयाणं, तेसु अणेगसयसहस्सखुत्तो सेसं जहा खहयराणं जाव कालमासे कालं किच्चा जाइं इमाइं उरपरिसप्पविहाणाइं भवंति, तं जहा- अहीणं, अयगराणं, आसालियाणं, महोरगाणं, तेसु अणेगसयसहस्सखुत्तो जाव जाइं इमाइं चउप्पयविहाणाई भवंति, तं जहा- एगखुराणं दुखुराणं गंडीपयाणं सणहपयाणं तेसु अणेगसयसहस्स खुत्तो जाव जाइं इमाई जलयरविहाणाई भवंति, तं जहा- मच्छाणं, कच्छभाणं जाव सुंसुमाराणं तेसु अणेगसयसहस्स खुत्तो जाव जाइं इमाइं चरिंदियविहाणाई भवंति, तं जहा- अंधियाणं, पोत्तियाणं जहा पण्णवणाए जाव गोमयकीडाणं तेस् अणेगसयसहस्सखुत्तो जाव जाइं इमाइं तेइंदियविहाणाइं भवंति, तं जहा- उवचियाणं जाव हत्थिसोंडाणं, तेसु अणेग-सयसहस्स-खुत्तो जाव जाइं इमाई बेइंदियविहाणाइं भवंति, तं जहा- पुलाकिमियाणं जाव समुद्दलिक्खाणं तेसु अणेगसय-सहस्सखुत्तो जावजाइं इमाइं वणस्सइविहाणाइं भवंति, तं जहा- रुक्खाणं गुच्छाणं जाव कहणाणं, तेसु अणेगसय-सहस्स-खुत्तो जाव पच्चायाइस्सइ । उस्सण्णं च णं कडुयरुक्खेसु कडुयवल्लीसु सव्वत्थ वि णं सत्थवज्झे जाव जाइं इमाई वाउक्काइयविहाणाई भवंति, तं जहा- पाईणवायाणं जाव सुद्धवायाणं, तेसु अणेगसयसहस्स-खुत्तो जाव जाइं इमाइं तेउक्काइय- विहाणाइं भवंति, तं जहा- इंगालाणं जाव सूरकंतमणिणिस्सियाणं, तेसु अणेगसयसहस्स-खुत्तो जाव जाइं इमाई आउक्काइयविहाणाइं भवंति, तं जहा- उस्साणं जाव खातोदगाणं, तेसु अणेगसय-सहस्स-खुत्तो जाव पच्चायाइस्सइ । उस्सण्णं च णं खारोदएसु, खातोदएसु; सव्वत्थ वि णं सत्थवज्झे जाव कालं किच्चा जाइं इमाइं पुढविकाइयविहाणाइं भवंति, तं जहा- पुढवीणं, सक्कराणं जाव सूरकंताणं, तेसु अणेगसयसहस्स-खुत्तो जाव पच्चायाहिइ, उस्सण्णं च णं खरबायर पुढविक्काइएसु, सव्वत्थ वि णं सत्थवज्झे जाव कालं किच्चा | रायगिहे णयरे बाहिं खरियत्ताए उववज्जिहिइ । तत्थ वि णं सत्थवज्झे जाव किच्चा दुच्चं पि रायगिहे णयरे अंतो खरियत्ताए उववज्जिहिइ । तत्थ वि णं सत्थवज्झे जाव किच्चा इहेव जंबुद्दीवे दीवे भारहे वासे विंझगिरिपायमूले बेभेले सण्णिवेसे माहणकुलंसि दारियत्ताए पच्चायाहिइ । तएणं तं दारियं अम्मापियरो उम्मुक्कबालभावं जोव्वणगमणुप्पत्तं पडिरूवएणं सुक्केणं, पडिरूवएणं विणएणं, पडिरूवयस्स भत्तारस्स भारियत्ताए दलइस्संति। सा णं तस्स भारिया भविस्सइ-इट्ठा कंता जाव अणुमया भंडकरंगडगसमाणा तेल्लकेला इव सुसंगोविया, चेलपेडा इव सुसंपरिग्गहिया, रयणकरंडओ विव सुसारक्खिया, सुसंगोविया, मा णं सीयं, मा णं उण्हं जाव परिस्सहोवसग्गा फुसंत् । तएणं सा दारिया अण्णया कयाइ गुठ्विणी ससुरकुलाओ कुलघरं णिज्जमाणी अंतरा दवग्गिजालाभिहया कालमासे कालं किच्चा दाहिणिल्लेसु अग्गिकुमारेसु देवेसु देवत्ताए उववज्जिहिइ । से णं तओहिंतो अणंतरं उव्वट्टित्ता माणुस्सं विग्गहं लभिहिइि, माणुस्सं विग्गहं लभित्ता केवलं बोहिं बुज्झिहिइ, बुज्झित्ता मुंडे भवित्ता अगाराओ अणगारियं पव्वइहिइ। तत्थ वि य
९९
409
| SR No. | 009905 |
| Book Title | Agam 05 Ang 05 Bhagvati Vyakhya Prajnapti Sutra Mool Sthanakvasi |
| Original Sutra Author | Sudharmaswami |
| Author | Devardhigani Kshamashaman |
| Publisher | Global Jain Agam Mission |
| Publication Year | 2012 |
| Total Pages | 653 |
| Language | Prakrit |
| Classification | Book_Devnagari, Agam, Canon, & agam_bhagwati |
| File Size | 8 MB |