Page Text
________________
भगवई सुत्त
आयरिय-उवज्झायाणं अयसकारए, अवण्णकारए अकित्तिकारए, बहूहिं असब्भावुब्भावणाहिं मिच्छत्ताभिणिवेसेहिं य अप्पाणं वा परं वा तदुभयं वा वुग्गाहेमाणे, वुप्पाएमाणे विहरित्ता सएणं तेएणं अण्णाइटे समाणे अंतो सत्तरत्तस्स पित्तज्जरपरिगयसरीरे दाहवक्कंतीए छउमत्थे चेव कालं करेस्सं | समणे भगवं महावीरे जिणे जिणप्पलावी जाव जिणसई पगासेमाणे विहरइ ! एवं संपेहेइ, एवं संपेहित्ता, आजीविए थेरे सद्दावेइ, सद्दावित्ता उच्चावय-सवह-साविए पकरेइ, पकरित्ता एवं वयासी- णो खलु अहं जिणे जिणप्पलावी जाव पगासेमाणे विहरिए अहं णं गोसाले चेव मंखलिपुत्ते, समणघायए जाव छउमत्थे चेव कालं करेस्सं, समणे भगवं महावीरे जिणे, जिणप्पलावी जाव जिणसदं पगासेमाणे विहरइ। तं तुब्भे णं देवाणुप्पिया ! मम कालगयं जाणित्ता वामे पाए सुंबेणं बंधह, बंधित्ता तिक्खुत्तो मुहे उभेह, उट्ठभेत्ता सावत्थीए णयरीए सिंघाडग जाव पहेसु आकड्ढविकटिं करेमाणा महया महया सद्देणं उग्घोसेमाणा उग्घोसेमाणा एवं वयह- णो खलु देवाणुप्पिया ! गोसाले मंखलिपुत्ते जिणे, जिणप्पलावी जाव एस णं गोसाले चेव मंखलीपुत्ते, समणघायए जाव छउमत्थे चेव कालगए । समणे भगवं महावीरे जिणे, जिणप्पलावी जाव विहरइ; महया अणिड्ढी-असक्कारसमुदएणं ममं सरीरगस्स
णीहरणं करेज्जाह; एवं वदित्ता कालगए | ७२ | तएणं आजीविया थेरा गोसालं मंखलिपुत्तं कालगयं जाणित्ता हालाहलाए कुंभकारीए
कुंभकारावणस्स दुवाराइं पिहेंति, पिहित्ता हालाहलाए कुंभकारीए कुंभकारावणस्स बहुमज्झदेसभाए सावत्थिं णयरिं आलिहंति, आलिहित्ता गोसालस्स मंखलिपुत्तस्स सरीरगं वामे पाए सुंबेणं बंधइ, बंधित्ता तिक्खुत्तो मुहे उद्दुहंति, उद्दहित्ता सावत्थीए णयरीए सिंग्घाडग जाव पहेसु आकड्ढविकढिं करेमाणा, णीयं णीयं सद्देणं उग्घोसेमाणा उग्घोसेमाणा एवं वयासी- णो खलु देवाणुप्पिया ! गोसाले मंखलिपुत्ते जिणे जिणप्पलावी जाव विहरिए, एस णं गोसाले चेव मंखलिपुत्ते समणघायए जाव छउमत्थे चेव कालगए । समणे भगवं महावीरे जिणे, जिणप्पलावी जाव विहरइ, सवहपडिमोक्खणगं करेंति, करित्ता दोच्चं पि पूयासक्कारथिरीकरणट्ठयाए गोसालस्स मंखलिपुत्तस्स वामाओ पायाओ सुंबं मयंति, सुंब मुइत्ता हालाहलाए कुंभकारीए कुंभकारावणस्स दुवारवयणाई अवगुणंति, अवगुणित्ता गोसालस्स मंखलिपुत्तस्स सरीरगं सुरभिणा गंधोदएणं ण्हाणेति, तं चेव जाव महया इढिसक्कार-समुदएणं गोसालस्स मंखलिपुत्तस्स सरीरगस्स णीहरणं करेंति । तएणं समणे भगवं महावीरे अण्णया कयाइ सावत्थीओ णयरीओ कोट्ठयाओ चेइयाओ पडिणिक्खमइ, पडिणिक्खमित्ता बहिया जणवयविहारं विहरइ । तेणं कालेणं तेणं समएणं मेंढियगामे णामं णयरे होत्था, वण्णओ | तस्स णं मेंढियगामस्स णयरस्स बहिया उत्तरपुरच्छिमे दिसिभाए एत्थ णं सालकोट्ठए णामं चेइए होत्था, वण्णओ जाव पुढविसिलापट्टओ । तस्स णं सालकोट्ठगस्स णं चेइयस्स अदूरसामंते एत्थ णं महेगे मालुयाकच्छए यावि होत्था- किण्हे किण्होभासे जाव णिउरंबभूए, पत्तिए, पुप्फिए, फलिए हरियग-रेरिज्जमाणे, सिरीए अईव-अईव उवसोभेमाणे चिट्ठइ । तत्थ णं मेंढियगामे णयरे रेवई णाम गाहावइणी परिवसइ, अड्ढा जाव अपरिभूया । तएणं समणे भगवं महावीरे अण्णया
402
| SR No. | 009905 |
| Book Title | Agam 05 Ang 05 Bhagvati Vyakhya Prajnapti Sutra Mool Sthanakvasi |
| Original Sutra Author | Sudharmaswami |
| Author | Devardhigani Kshamashaman |
| Publisher | Global Jain Agam Mission |
| Publication Year | 2012 |
| Total Pages | 653 |
| Language | Prakrit |
| Classification | Book_Devnagari, Agam, Canon, & agam_bhagwati |
| File Size | 8 MB |