________________
भगवई सुत्त
खेत्तावीचियमरणे णं भंते ! कइविहे पण्णत्ते ? गोयमा ! चउविहे पण्णत्ते, तं जहाणेरइयखेत्तावीचियमरणे जाव देवखेत्तावीचियमरणे |
से केणटेणं भंते! एवं वच्चइ- णेरड्यखेत्तावीचियमरणे णेरड्यखेत्तावीचिय मरणे?
गोयमा ! जण्णं णेरइया णेरइयखेत्ते वट्टमाणा जाइं दव्वाइं णेरइयाउयत्ताए गहियाइं, एवं जहेव दव्वावीचियमरणे तहेव खेत्तावीचियमरणे वि । एवं जाव भावावीचियमरणे। ओहिमरणे णं भंते ! कइविहे पण्णत्ते ? गोयमा ! पंचविहे पण्णत्ते, तं जहा- दव्वोहि-मरणे, खेत्तोहि-मरणे जाव भावोहि-मरणे | दव्वोहि-मरणे णं भंते ! कइविहे पण्णत्ते ? गोयमा ! चउव्विहे पण्णत्ते, तं जहा- णेरइयदव्वोहि-मरणे जाव देव-दव्वोहि-मरणे । से केणटेणं भंते ! एवं वुच्चइ- णेरइय-दव्वोहि-मरणे णेरड्य-दव्वोहि मरणे ? गोयमा ! जण्णं णेरड्या णेरड्यदव्वे वट्टमाणा जाइं दव्वाइं संपयं मरंति, ते णं णेरड्या ताई दव्वाइं अणागए काले पुणो वि मरिस्संति, से तेणटेणं गोयमा ! जाव णेरइय दव्वोहिमरणे । एवं तिरिक्खजोणिय-मणुस्स-देवदव्वोहिमरणे वि । एवं एएणं गमेणं खेत्तोहिमरणे वि, कालोहिमरणे वि, भवोहिमरणे वि, भावोहिमरणे वि । आइयंतियमरणे णं भंते ! पुच्छा | गोयमा ! पंचविहे पण्णत्ते, तं जहा- दव्वाइयंतियमरणे, खेत्ताइयंतियमरणे, जाव भावाइयंतियमरणे । दव्वाइयंतियमरणे णं भंते ! कइविहे पण्णत्ते ? गोयमा ! चउव्विहे पण्णत्ते, तं जहाणेरड्यदव्वाइयंतियमरणे जाव देवदव्वाइयंतियमरणे । से केणटेणं भंते ! एवं वुच्चइ- णेरड्यदव्वाइयंतियमरणे णेरइय - दव्वाइयंतिय मरणे? गोयमा ! जण्णं णेरड्या णेरड्यदव्वे वट्टमाणा जाइं दव्वाइं संपयं मरंति, तेणं णेरड्या ताई दव्वाइं अणागए काले णो पुणो वि मरिस्संति, से तेणटेणं जाव णेरइयदव्वाइयंतिय मरणे । एवं तिरिक्ख-जोणिय-मणुस्स-देवाइयंतियमरणे, एवं खेत्ताइयंतियमरणे वि, एवं जाव भावाइयंतियमरणे वि । बालमरणे णं भंते ! कइविहे पण्णत्ते ? गोयमा ! दुवालसविहे पण्णत्ते, तं जहा- वलयमरणं, वसट्टमरणं एवं जहा खंदए जाव गिद्धपुट्ठ-मरणं । पंडियमरणे णं भंते ! कइविहे पण्णत्ते ? गोयमा ! दुविहे पण्णत्ते, तं जहा- पाओवगमणे य भत्तपच्चक्खाणे य । पाओवगमणे णं भंते ! कइविहे पण्णत्ते ? गोयमा ! दुविहे पण्णत्ते, तं जहा- णीहारिमे य अणीहारिमे य जाव णियमं अपडिकम्मे ।
२८
भत्तपच्चक्खाणे णं भंते ! कइविहे पण्णत्ते ? गोयमा ! तं चेव जहा पाओवगमणे, णवरं णियमं सपडिकम्मे || सेवं भंते ! सेवं भंते ! ||
॥ सत्तमो उद्देसो समत्तो ||
363
