________________
३७
[]
用
ल
[]
भगवई सुत्त
गोयमा ! सव्वत्थोवा णरदेवा, देवाहिदेवा संखेज्जगुणा, धम्मदेवा संखेज्जगुणा, भवियदव्वदेवा असंखेज्जगुणा, भावदेवा असंखेज्जगुणा ।
एएसि णं भंते ! भावदेवाणं भवणवासीणं, वाणमंराणं, जोइसियाणं, वेमाणियाणं सोहम्मगाणं जाव अच्चुयगाणं, गेवेज्जगाणं, अणुत्तरोववाइयाण य कयरे कयरेहिंतो अप्पा वा जाव विसेसाहिया वा ?
गोयमा ! सव्वत्थोवा अणुत्तरोववाइया भावदेवा, उवरिमगेवेज्जा भावदेवा संखेज्जगुणा, मज्झिमगेवेज्जा संखेज्जगुणा, हेट्ठिमगेवेज्जा संखेज्जगुणा, अच्चुए कप्पे देवा संखेज्जगुणा जाव आणयकप्पे देवा संखेज्जगुणा, एवं जहा जीवाभिगमे तिविहे देवपुरिसे अप्पाबहुयं जाव जोइसिया भावदेवा असंखेज्जगुणा ॥ सेवं भंते ! सेवं भंते ! ॥
॥ णवमो उद्देसो समत्तो ॥
दसमो उद्देसो
विहा णं भंते! आया पण्णत्ता ?
गोयमा ! अट्ठविहा आया पण्णत्ता, तं जहा- दवियाया, कसायाया, जोगाया, उवओगाया, णाणाया, दंसणाया, चरित्ताया, वीरियाया ।
जस्स णं भंते! दवियाया तस्स कसायाया, जस्स कसायाया तस्स दवियाया ?
गोयमा ! जस्स दवियाया तस्स कसायाया सिय अत्थि सिय णत्थि, जस्स पुण कसायाया तस्स दवियाया नियमं अत्थि ।
जस्स णं भंते! दवियाया तस्स जोगाया, पुच्छा ?
गोयमा ! जहा दवियाया कसायाया भणिया तहा दवियाया जोगाया भाणियव्वा।
जस्स णं भंते! दवियाया तस्स उवओगाया, पुच्छा ?
गोयमा ! जस्स दवियाया तस्स उवओगाया नियमं अत्थि, जस्स उवओगाया तस्स वि दवियाया नियमं अत्थि ।
जस्स दवियाया तस्स णाणाया भयणाए, जस्स पुण णाणाया तस्स दवियाया णियमं अत्थि। जस्स दवियाया तस्स दंसणाया नियमं अत्थि, जस्स वि दंसणाया तस्स दवियाया नियमं अत्थि ।
जस्स दवियाया तस्स चरित्ताया भयणाए, जस्स पुण चरित्ताया तस्स दवियाया णियमं अत्थि । एवं वीरियायाए वि समं ॥ १ ॥
जस्स णं भंते! कसायाया तस्स जोगाया, जस्स जोगाया तस्स कसायाया ?
गोयमा ! जस्स कसायाया तस्स जोगाया णियमं अत्थि, जस्स पुण जोगाया तस्स कसायाया सिय अत्थि सिय णत्थि । एवं उवओगायाए वि समं कसायाया णेयव्वा ।
कसायाया य णाणाया य परोप्परं दो वि भइयव्वाओ ।
337
