________________
भगवई सुत्त
एवं वेउव्वियपोग्गलपरियट्टे वि, णवरं वेउव्वियसरीरे वट्टमाणेणं वेउव्वियसरीर पाओग्गाई दव्वाइं वेउव्वियसरीरत्ताए गहियाइं सेसं तं चेव सव्वं, एवं जाव आणापाणपोग्गल- परियट्टे, णवरं आणापाणुपाओग्गाइं सव्वदव्वाइं आणापाणुत्ताए गहियाइं, सेसं तं चेव । ओरालियपोग्गलपरियट्टे णं भंते ! केवइकालस्स णिव्वत्तिज्जइ ? गोयमा ! अणंताहिं उस्सप्पिणि-ओसप्पिणीहिं, एवइकालस्स णिव्वित्तिज्जइ। एवं वेउव्वियपोग्गलपरियट्टे वि । एवं जाव आणापाणपोग्गलपरियट्टे वि | एयस्स णं भंते ! ओरालिय-पोग्गलपरियट्ट-णिव्वत्तणा-कालस्स, वेउव्विय-पोग्गल-परियट्टणिव्वत्तणा-कालस्स जाव आणापाण-पोग्गलपरियट्ट-णिव्वत्तणा-कालस्स कयरे कयरेहितो अप्पा वा जाव विसेसाहिया वा ? गोयमा ! सव्वत्थोवे कम्मग - पोग्गलपरियट्ट - णिव्वत्तणाकाले, तेया - पोग्गलपरियट्टणिव्वत्तणाकाले अणंतगुणे, ओरालिय-पोग्गल-परियट्ट-णिवत्तणाकाले अणंतगुणे, आणापाणुपोग्गलपरियट्ट - णिवत्तणाकाले अणंतगुणे, मणपोग्गल - परियट्ट - णिवत्तणाकाले अणंतगुणे, वइपोग्गल - परियट्ट- णिवत्तणाकाले अणंतगुणे वेठव्विय - पोग्गलपरियट्टणिव्वत्तणाकाले अणंतगुणे | एएसि णं भंते ! ओरालियपोग्गलपरियट्टाणं जाव आणापाणुपोग्गल-परियडाण य कयरे कयरेहिंतो अप्पा वा जाव विसेसाहिया वा ? गोयमा ! सव्वत्थोवा वेउवियपोग्गलपरियट्टा, वइपोग्गलपरिया मणपोग्गलपरियट्टा अणंतगुणा, आणापाणुपोग्गलपरियट्टा अणंतगुणा, ओरालियपोग्गलपरियट्टा अणंतगुणा, तेयापोग्गलपरियट्टा अणंतगुणा, कम्मगपोग्गलपरियट्टा अणंतगुणा । | सेवं भंते ! सेवं भंते ! ||
|| चउत्थो उद्देसो समत्तो ||
पंचमो उद्देसो
रायगिहे जाव एवं वयासी-अह भंते ! पाणाइवाए मुसावाए अदिण्णादाणे मेहणे परिग्गहे- एस णं कइवण्णे कइगंधे कइरसे कइफासे पण्णत्ते ? गोयमा ! पंचवण्णे, दुगंधे, पंचरसे, चउफासे पण्णत्ते । अह भंते ! कोहे, कोवे, रोसे, दोसे, अखमा, संजलणे, कलहे, चंडिक्के भंडणे, विवादे; एस णं कइवण्णे जाव कइफासे पण्णत्ते ? गोयमा ! पंचवण्णे, दुगंधे, पंचरसे, चउफासे पण्णत्ते । अह भंते ! माणे, मए, दप्पे, थंभे, गव्वे, अत्तुक्कोसे, परपरिवाए, उक्कासे, अवक्कासे, उण्णत्ते, उण्णामे, दुण्णामे; एस णं कइवण्णे कइ फासे पण्णत्ते ? गोयमा ! पंचवण्णे, दुगंधे, पंचरसे, चउफासे पण्णत्ते ।
325
