Page Text
________________
भगवई सुत्त लूहेत्ता सरसेणं गोसीसचंदणेणं गायाइं अणुलिंपड़; एवं जहेव जमालिस्स अलंकारो तहेव जाव कप्परुक्खगं विव अलंकियविभूसियं करेइ, करित्ता करयल जाव कट्टु सिवभदं कुमारं जएणं विजएणं वद्धावेंति, जएणं विजएणं वद्धावित्ता ताहिं इट्ठाहिं कंताहिं पियाहिं जहा उववाइए कूणियस्स जाव परमाउं पालयाहि, इट्ठजणसंपरितुडे हत्थिणाउरस्स णयरस्स अण्णेसिं च बहूणं गामागर-णयरं जाव विहराहि, त्ति कट्ट जयजयसदं पउंजंति । तएणं से सिवभद्दे कुमारे राया जाए | महया हिमवंत- महंत-मलयमंदरमहिंदसारे, वण्णओ जाव रज्जं पसासेमाणे विहरइ । तएणं से सिवे राया अण्णया कयाइं सोभणंसि तिहि करण-दिवस-मुहुत्त-णक्खतंसि विउलं असण-पाण-खाइम-साइमं उवक्खडावेइ, उवक्खडावेत्ता मित्त-णाइ-णियग सयण संबंधी परिजणं रायाणो य खत्तिया य आमतेइ, आमंतेत्ता तओ पच्छा बहाए जाव विभूसियसरीरे भोयणवेलाए भोयणमंडवंसि सुहासणवरगए तेणं मित्त- णाइ- णियगसयण-संबंधि-परिजणेणं राएहि य खत्तिएहि य सद्धिं विउलं असण-पाण- खाइम-साइमं एवं जहा तामली जाव सक्कारेइ, सम्माणेइ, सक्कारित्ता सम्माणित्ता तं मित्त-णाइ-णियग-सयण-संबंधि परिजणं रायाणो य खत्तिए य सिवभदं च रायाणं आपुच्छड़, आपुच्छित्ता सुबहुं लोही-लोहकडाहकडुच्छुयं तंबियं तावसभंडगं गहाय जे इमे गंगाकूलगा वाणपत्था तावसा भवंति, तं चेव जाव तेसिं अंतियं मुंडे भवित्ता दिसापोक्खिय तावसत्ताए पव्वइए | पव्वइए वि य णं समाणे अयमेयारूवं अभिग्गहं अभिगिण्हइ-कप्पड़ मे जावज्जीवाए छटुं छट्टेणं तं चेव जाव अभिग्गहं अभिगिण्हइ, अभिगिण्हित्ता पढम छटुक्खमणं उवसंपज्जित्ता णं विहरइ । तएणं से सिवे रायरिसी पढमछ?क्खमणपारणगंसि आयावणभूमीओ पच्चोरुहइ, पच्चोरुहित्ता वागलवत्थणियत्थे जेणेव सए उडए तेणेव उवागच्छइ, उवागच्छित्ता किढिणसंकाइयगं गिण्हइ, गिण्हित्ता पुरत्थिमं दिसं पोक्खेइ, पुरत्थिमाए दिसाए सोमे महाराया पत्थाणे पत्थियं "अभिरक्खउ सिवं रायरिसी, अभिरक्खित्ता जाणि य तत्थकंदाणि य मूलाणि य तयाणि य पत्ताणि य पुप्फाणि य फलाणि य बीयाणि य हरियाणि य ताणि अणुजाणउ” ति कट्ट पुरत्थिमं दिसं पसरइ, पुरत्थिमं दिसं पसरइत्ता जाणि य तत्थ कंदाणि य जाव हरियाणि य ताइं गेण्हइ, गिण्हेत्ता किढिणसंकाइयगं भरेइ, भरेत्ता दब्भे य कुसे य समिहाओ य पत्तामोडं च गिण्हइ, गिण्हेत्ता जेणेव सए उडए तेणेव उवागच्छइ, उवागच्छित्ता किढिणसंकाइयगं ठवेइ, ठवेत्ता वेदिं वड्ढेइ, वड्ढेत्ता उवलेवण-संमज्जणं करेइ, करेत्ता दब्भ-कलस-हत्थगए जेणेव गंगा महाणई तेणेव उवागच्छइ, उवागच्छित्ता गंगामहाणइं ओगाहेइ, ओगाहेत्ता जलमज्जणं करेइ, करेत्ता जलकीडं करेइ, करेत्ता जलाभिसेयं करेइ, करेत्ता आयंते चोक्खे परमसुइभूए देवय-पिइकयकज्जे दब्भ- कलसहत्थगए गंगाओ महाणईओ पच्चुत्तरइ, पच्चुत्तरित्ता जेणेव सए उडए तेणेव उवागच्छइ, उवागच्छित्ता दब्भेहि य कुसेहि य वालुयाएहि य वेइं रएइ, वेइं रएत्ता सरएणं अरणिं महेइ, महेत्ता अग्गिं पाडेइ, पाडेत्ता अग्गिं संधुक्केइ, संधुक्केत्ता समिहाकट्ठाई पक्खिवइ, पक्खित्ता अग्गिं उज्जालेइ, उज्जालेत्ता अग्गिस्स दाहिणे पासे सत्तंगाइं समादहे। तं जहासकहं वक्कलं ठाणं, सिज्जा भंडं कमंडलं । दंडदारुं तहअप्पाणं, अहेताइं समादहे ||
289
| SR No. | 009905 |
| Book Title | Agam 05 Ang 05 Bhagvati Vyakhya Prajnapti Sutra Mool Sthanakvasi |
| Original Sutra Author | Sudharmaswami |
| Author | Devardhigani Kshamashaman |
| Publisher | Global Jain Agam Mission |
| Publication Year | 2012 |
| Total Pages | 653 |
| Language | Prakrit |
| Classification | Book_Devnagari, Agam, Canon, & agam_bhagwati |
| File Size | 8 MB |