________________
२०
२१
२२
२३
२४
२५
२६
२७
२८
२९
३०
भगवई सुत्त
गोयमा ! साइयं वा सपज्जवसियं बंधइ, अणाइयं वा सपज्जवसियं बंधइ, अणाइयं वा अपज्जवसियं बंधइ, णो चेव णं साइयं अपज्जवसियं बंधइ ।
तं भंते ! किं देसेणं देसं बंधइ पुच्छा ? गोयमा ! जहेव इरियावहियाबंधगस्स जाव सव्वेणं सव्वं बंधइ ।
कइ णं भंते ! कम्मप्पगडीओ पण्णत्ताओ ? गोयमा ! अट्ठ कम्मप्पगडीओ पण्णत्ताओ, तं जहा- णाणावरणिज्जं जाव अंतराइयं ।
कइ णं भंते ! परिसहा पण्णत्ता ? गोयमा ! बावीसं परीसहा पण्णत्ता, तं जहादिगिंछापरिसहे, पिवासापरिसहे जाव दंसणपरिसहे ।
एए णं भंते ! बावीसं परीसहा कइसु कम्मपयडीसु समोयरंति ? गोयमा ! चउसु कम्मपयडीसु समोयरंति, तं जहा- णाणावरणिज्जे, वेयणिज्जे, मोहणिज्जे, अंतराइए ।
णाणावरणिज्जे णं भंते ! कम्मे कइ परीसहा समोयरंति ? गोयमा ! दो परीसहा समोयरंति, तं जहा - पण्णा परीसहे, अणाण परीसहे य ।
वेणिज्जे णं भंते! कम्मे कइ परीसहा समोयरंति ? गोयमा ! एक्कारस परीसहा समोयरंति, तं जहा
पंचेव आणुपुव्वी, चरिया सेज्जा वहे य रोगे य ।
तणफास-जल्लमेव य, एक्कारस वेयणिज्जमि ॥
दंसणमोहणिज्जे णं भंते ! कम्मे कइ परीसहा समोयरंति ? गोयमा ! एगे दंसण परीसहे समोर ।
चरित्तमोहणिज्जे णं भंते! कम्मे कइ परीसहा समोयरंति ? गोयमा ! सत्त परीसहा समोयरंति, तं जहा
अरई अचेल इत्थी, णिसीहिया जायणा य अक्कोसे ।
सक्कार पुरक्कारे, चरित्तमोहम्मि सत्तेए ॥१॥
अंतराइए णं भंते! कम्मे कइ परीसहा समोयरंति ? गोयमा ! एगे अलाभ परीसहे समोयरइ
I
सत्तबिहबंधगस्स णं भंते! कइ परीसहा पण्णत्ता ?
गोयमा ! बावीसं परीसहा पण्णत्ता, बीसं पुण वेएड् । जं समयं सीयपरीसहं वेएइ णो तं समयं उसिणपरीसहं वेएइ । जं समयं उसिणपरीसहं वेएइ, णो तं समयं सीयपरीसहं वेए । जं समयं चरियापरीसहं वेएइ, णो तं समयं णिसीहिया परीसहं वेएइ । जं समयं णिसीहिया परीसहं वेएइ, णो तं समयं चरिया परीसहं वेएड् ।
अट्ठविहबंधगस्स णं भंते! कइ परीसहा पण्णत्ता ?
210
