________________
९५
९६
९७
९८
९९
| १००
१०१
| १०२
१०३
१०४
भगवई सुत्त
सवेयगा णं भंते ! जीवा किं णाणी अण्णाणी ? गोयमा ! जहा सइंदिया । एवं इत्थि - पुरिसणपुंसग वेयगा वि। अवेयगा जहा अकसाई ।
आहारगा णं भंते ! जीवा किं णाणी अण्णाणी? गोयमा ! जहा सकसाई, णवरं केवलणाणं वि। अणाहारगा णं भंते ! जीवा किं णाणी, अण्णाणी ? गोयमा ! णाणी वि, अण्णाणी वि, मणपज्जवणाणवज्जाई णाणाई, अण्णाणाणि य तिण्णि भयणाए ।
आभिणिबोहियणाणस्स णं भंते! केवइए विसए पण्णत्ते ?
गोयमा ! से समासओ चउव्विहे पण्णत्ते, तं जहा- दव्वओ, खेत्तओ, कालओ, भावओ । दव्वओ णं आभिणिबोहियणाणी आएसेणं सव्वदव्वाइं जाणइ पासइ, खेत्तओ णं आभिणिबोहियणाणी, आएसेणं सव्वं खेत्तं जाणइ पासइ, एवं कालओ वि, एवं भावओ वि।
सुयणाणस्स णं भंते! केवइए विसए पण्णत्ते ?
गोयमा ! ते समासओ चउव्विहे पण्णत्ते, तं जहा- दव्वओ, खेत्तओ, कालओ, भावओ । दव्वओ णं सुयणाणी उवउत्ते सव्वदव्वाइं जाणइ, पासइ; एवं खेत्तओ वि, कालओ वि । एवं भावओ वि सुयणाणी उवउत्ते सव्वभावे जाणइ, पासइ ।
ओहिणाणस्स णं भंते! केवइए विसए पण्णत्ते ?
गोयमा ! से समासओ चउव्विहे पण्णत्ते, तं जहा- दव्वओ, खेत्तओ, कालओ, भावओ । दव्वओ णं ओहिणाणी रूविदव्वाइं जाणइ पासइ, एवं जहा णंदीए जाव भावओ ।
मणपज्जवणाणस्स णं भंते! केवइए विसए पण्णत्ते ?
गोयमा ! से समासओ चउव्विहे पण्णत्ते, तं जहा- दव्वओ, खेत्तओ, कालओ, भावओ । दव्वओ णं उज्जुमइ अणते अणतपएसिए, एवं जहा णंदीए जाव भावओ।
केवलणाणस्स णं भंते! केवइए विसए पण्णत्ते ?
गोयमा ! से समासओ चउव्विहे पण्णत्ते, तं जहा- दव्वओ, खेत्तओ, कालओ, भावओ । दव्वओ णं केवलणाणी सव्वदव्वाइं जाणइ पासइ, एवं जाव भावओ णं केवलणाणी सव्वे भावे जाणइपासइ ।
मइ अण्णाणस्स णं भंते! केवइए विसए पण्णत्ते ?
गोयमा ! से समासओ चउव्विहे पण्णत्ते, तं जहा- दव्वओ, खेत्तओ, कालओ, भावओ । दव्वओ णं मइअण्णाणी मइअण्णाणपरिगयाइं दव्वाइं जाणइ पासइ, एवं जाव भावओ णं मइ अण्णाणी मइअण्णाणपरिगए भावे जाणइ पासइ ।
अण्णाणस्स णं भंते! केवइए विसए पण्णत्ते ?
गोयमा ! से समासओ चउव्विहे पण्णत्ते, तं जहा- दव्वओ, खेत्तओ, कालओ, भावओ । दव्वओ णं सुयअण्णाणी सुयअण्णाणपरिगयाइं दव्वाइं आघवेइ, पण्णवेइ, परूवेइ । एवं खेत्तओ, कालओ, भावओ णं सुयअण्णाणी सुयअण्णाण - परिगए भावे आघवेइ पण्णवेइ परूवेइ।
195
