________________
१६
१७
१८
१९
२०
२१
२२
२३
भगवई सुत्त
पिसाया जाव गंधव्वा । पंचविहा जोइसिया, तं जहा- चंदविमाण- जोइसियदेव - पंचिंदियपओगपरिणया जाव ताराविमाण- जोइसियदेव - पंचिदिय-पओगपरिणया ।
वेमाणिया पओगपरिणया दुविहा पण्णत्ता, तं जहा- कप्पोवग-वेमाणिय पओगपरिणया, कप्पाईयवेमाणिय- पओगपरिणया । कप्पोवगवेमाणिय-पओगपरिणया दुवालसविहा पण्णत्ता, तं जहा- सोहम्मकप्पोवगवेमाणिया जाव अच्चुयकप्पोवग- वेमाणिया पओगपरिणया । कप्पाईयवेमाणिया पओगपरिणया दुविहा पण्णत्ता, तं जहा- गेवेज्जग-कप्पाईय वेमाणिया पओगपरिणया, अणुत्तरोववाईय-कप्पाईय-वेमाणिय-पओगपरिणया 1 गेवेज्ज-कप्पाईयवेमाणिय-पओगपरिणया णवविहा पण्णत्ता, तं जहा - हेट्ठिम-हेट्ठिम- गेवेज्जग- कप्पाईयवेमाणिय-पओगपरिणया जाव उवरिम- उवरिम- गेवेज्ज- कप्पाईय- वेमाणिय- पओगपरिणया । अणुत्तरोववाइय-कप्पाईय-वेमाणियदेव पंचिंदिय-पओगपरिणया णं भंते ! पोग्गला कइविहा
पण्णत्ता ?
गोयमा ! पंचविहा पण्णत्ता, तं जहा - विजयअणुत्तरोववाइय- कप्पाईय वेमाणिय-पओगपरिणया जाव सव्वट्ठसिद्ध- अणुत्तरोववाइय-कप्पाईय-वेमाणियदेव पंचिंदिय- पओगपरिणया । सुहुम-पुढविक्काइय-एगिंदिय-पओगपरिणया णं भंते पोग्गला कइविहा पण्णत्ता ? गोयमा ! दुविहा पण्णत्ता, तं जहा- पज्जत्तग-सुहुमपुढविक्काइय-एगिंदिय- पओग परिणया य अपज्जत्तग- सुहुम-पुढविक्काइय एगिंदिय पओग परिणया य । बादर पुढविक्काइयएगिंदिय पओगपरिणया एवं चेव । एवं जाव वणस्सइकाइया । एक्केक्का दुविहा सुहुमा य बायरा य पज्जत्तगा अपज्जत्तगा य भाणियव्वा ।
बेइंदियपओगपरिणयाणं, पुच्छा ?
गोयमा ! दुविहा पण्णत्ता, तं जहा- पज्जत्तगबेइंदियपओगपरिणया य अपज्जत्तग बेइंदियपओग परिणया य । एवं तेइंदिया, चउरिंदिया वि ।
रयणप्पभापुढविणेरइय पओगपरिणयाणं, पुच्छा ?
गोयमा ! दुविहा पण्णत्ता, तं जहा- पज्जत्तग-रयणप्पभापुढवी - णेरड्य-पओग-परिणया य अपज्जत्तग-रयणप्पभापुढवी-णेरइय-पओगपरिणया य । एवं जाव असत्तमा ।
संमुच्छिम-जलयर-तिरिक्खजोणिय-पंचेंदिय-पओगपरिणयाणं, पुच्छा ?
गोयमा ! दुविहा पण्णत्ता, तं जहा- पज्जत्तगा य अपज्जत्तगा य । एवं गब्भवक्कंतिया वि। संमुच्छिम- चउप्पय-थलयरा एवं चेव; एवं गब्भवक्कंतिया वि । एवं जाव संमुच्छिम-खहयरा य गब्भवक्कंतिय-खहयरा य, एक्केक्के पज्जत्तगा अपज्जत्तगा य भाणियव्वा ।
संमुच्छिम-मणुस्स-पंचिंदिय-पओगपरिणयाणं, पुच्छा ? गोयमा ! एगविहा पण्णत्ता
अपज्जत्तगा चेव ।
गब्भवक्कंतिय-मणुस्स-पंचिंदिय-पओगपरिणयाणं, पुच्छा ?
176
