________________
भगवई सुत्त
गोयमा ! जस्स णं कोह-माण-माया-लोभा वोच्छिण्णा भवंति, तस्स णं इरियावहिया किरिया कज्जइ; तहेव जाव उस्सुत्तं रीयमाणस्स संपराइया किरिया कज्जइ; से णं अहासुत्तमेव रीयइ, से तेणटेणं गोयमा ! जाव णो संपराइया किरिया कज्जइ ।
रूवी णं भंते ! कामा, अरूवी कामा ? गोयमा ! रूवी कामा, णो अरूवी कामा ।
सचित्ता भंते ! कामा, अचित्ता कामा ? गोयमा ! सचित्ता वि कामा, अचित्ता वि कामा ।
जीवा भंते ! कामा, अजीवा कामा ? गोयमा ! जीवा वि कामा, अजीवा वि कामा ।
जीवाणं भंते ! कामा, अजीवाणं कामा ? गोयमा ! जीवाणं कामा, णो अजीवाणं कामा ।
कइविहा णं भंते ! कामा पण्णत्ता ? गोयमा ! दुविहा कामा पण्णत्ता, तं जहा- सद्दा य रूवा य।
रूवी भंते ! भोगा, अरूवी भोगा ? गोयमा ! रूवी भोगा, णो अरूवी भोगा ।
सचित्ता भंते ! भोगा, अचित्ता भोगा ? गोयमा ! सचित्ता वि भोगा, अचित्ता वि भोगा |
जीवा भंते ! भोगा, अजीवा भोगा ? गोयमा ! जीवा वि भोगा, अजीवा वि भोगा |
जीवाणं भंते ! भोगा, अजीवाणं भोगा ? गोयमा ! जीवाणं भोगा, णो अजीवाणं भोगा ।
कइविहा णं भंते ! भोगा पण्णत्ता ? गोयमा ! तिविहा भोगा पण्णत्ता, तं जहा- गंधा, रसा, फासा ।
कइविहा णं भंते ! कामभोगा पण्णत्ता ? गोयमा ! पंचविहा कामभोगा पण्णत्ता, तं जहा- सद्दा रूवा गंधा रसा फासा।
जीवा णं भंते ! किं कामी, भोगी ? गोयमा ! जीवा कामी वि भोगी वि | से केणटेणं भंते ! एवं वुच्चइ- जीवा कामी वि भोगी वि ? गोयमा ! सोइंदिय-चक्खिंदियाइं पडुच्च कामी, घाणिंदिय-जिब्भिंदिय-फासिंदियाइं पडुच्च भोगी, से तेणटेणं गोयमा ! जीवा कामी वि भोगी वि ।
णेरइया णं भंते ! किं कामी, भोगी ? गोयमा ! जहा जीवा तहा णेरइया । एवं जाव थणियकुमारा पुढविकाइयाणं पुच्छा | गोयमा ! पुढविकाइया णो कामी, भोगी । से केणटेणं जाव भोगी ? गोयमा ! फासिंदिय पडुच्च; से तेणटेणं जाव भोगी; एवं जाव वणस्सइकाइया । बेइंदिया एवं चेव, णवरं जिब्भिंदिय-फासिंदियाइं पडुच्च भोगी । तेइंदिया वि एवं चेव, णवरं घाणिंदियजिब्भिंदियफासिंदियाइं पडुच्च भोगी।
163
