________________
भगवई सुत्त
गोयमा ! इहगए सिय महावेयणे सिय अप्पवेयणे, उववज्जमाणे सिय महावेयणे सिय अप्पवेयणे; अह णं उववण्णे भवइ, तओ पच्छा एगंतसायं वेयणं वेदेइ, आहच्च असायं । एवं जाव थणियकुमारेसु । जीवे णं भंते ! जे भविए पुढविक्काइएसु उववज्जित्तए, पुच्छा ? गोयमा ! इहगए सिय महावेयणे सिय अप्पवेयणे; एवं उववज्जमाणे वि, अह णं उववण्णे भवइ, तओ पच्छा वेमायाए वेयणं वेदेइ । एवं जाव मणुस्सेसु । वाणमंतर-जोइसियवेमाणिएसु जहा असुरकुमारेसु । जीवा णं भंते ! किं आभोगणिव्वत्तियाउया, अणाभोगणिव्वत्तियाउया ? गोयमा ! णो आभोगणिव्वत्तियाउया, अणाभोगणिव्वत्तियाउया । एवं णेरड्या वि । एवं जाव वेमाणिया ।
अत्थि णं भंते ! जीवाणं कक्कस-वेयणिज्जा कम्मा कज्जंति ? गोयमा ! हंता, अत्थि ।
कहं णं भंते ! जीवाणं कक्कस-वेयणिज्जा कम्मा कज्जंति ? गोयमा ! पाणाइवाएणं जाव मिच्छादसणसल्लेणं । एवं खलु गोयमा ! जीवाणं कक्कसवेयणिज्जा कम्मा कज्जंति ।
अत्थि णं भंते ! णेरइयाणं कक्कस-वेयणिज्जा कम्मा कज्जंति ? गोयमा ! एवं चेव । एवं जाव वेमाणियाणं ।
अत्थि णं भंते ! जीवाणं अकक्कस-वेयणिज्जा कम्मा कज्जंति ?
गोयमा ! हंता, अत्थि |
कहं णं भंते ! जीवाणं अकक्कस-वेयणिज्जा कम्मा कज्जति ? गोयमा ! पाणाइवायवेरमणेणं जाव परिग्गहवेरमणेणं, कोहविवेगेणं जाव मिच्छादसणसल्लविवेगेणं; एवं खल गोयमा ! जीवाणं अकक्कसवेयणिज्जा कम्मा कज्जति ।
अत्थि णं भंते ! णेरइयाणं अकक्कसवेयणिज्जा कम्मा कज्जंति ? गोयमा ! णो इणद्वे समढ़े। एवं जाव वेमाणिया; णवरं मणुस्साणं जहा जीवाणं ।
अत्थि णं भंते ! जीवाणं सायावेयणिया कम्मा कज्जंति ? हंता, अत्थि ।
कहं णं भंते ! जीवाणं सायावेयणिज्जा कम्मा कज्जंति ? गोयमा ! पाणाणुकंपयाए भूयाणुकंपयाए जीवाणुकंपयाए सत्ताणुकंपयाए बहुणं पाणाणं जाव सत्ताणं अदुक्खणयाए, असोयणयाए, अजूरणयाए, अतिप्पणयाए, अपिट्टणयाए, अपरियावणयाए; एवं खलु गोयमा ! जीवाणं सायावेयणिज्जा कम्मा कज्जति । एवं णेरड्याण वि | एवं जाव वेमाणियाणं |
160
