________________
|१२
१३
१४
१५
समवायांग सूत्र
इमीसे णं रयणप्पभाए पुढवीए बहुसमरमणिज्जाओ भूमिभागाओ अट्ठहिं जोयणसएहिं सूरिए चारं चरति । अरहओ णं अरिट्ठणेमिस्स अट्ठसयाइं वाईणं सदेवमणुयासुरंमि लोगंमि वाए अपराजिआणं उक्कोसिया वाईसंपया होत्था | ||८०० ॥
आणय-पाणय-आरण-अच्चुएस कप्पेसु विमाणा णव णव जोयणसयाई उड्ढं उच्चत्तेणं पण्णत्ता । णिसढकूडस्स णं उवरिल्लाओ सिहरतलाओ णिसदस्स वासहरपव्वयस्स समे धरणितले एस णं णव जोयणसयाइं अबाहाए अंतरे पण्णत्ते । एवं णीलवंतकूडस्स वि । विमलवाहणे णं कुलगरे णव धणुसयाई उड्ढं उच्चत्तेणं होत्था ।
इमीसे णं रयणप्पभाए बहुसमरमणिज्जाओ भूमिभागाओ णवहिं जोयणसएहिं सव्वुवरिमे तारारुवे चारं चरइ ।
णिसढस्स णं वासहरपव्वयस्स उवरिल्लाओ सिहरतलाओ इमीसे णं रयणप्पभाए पुढवीए पढमस्स कंडस्स बहुमज्झदेसभाए एस णं णव जोयणसयाई अबाहाए अंतरे पण्णत्ते । एवं णीलवंतस्स वि
॥९००॥
सव्वे वि णं गेवेज्जविमाणे दस दस जोयणसयाई उड्ढं उच्चत्तेणं पण्णत्ते।
सव्वे वि णं जमगपव्वया दस दस जोयणसयाई उड्ढं उच्चत्तेणं पण्णत्ता, दस दस गाउयसयाई उव्वेहेणं पण्णत्ता, मूले दस दस जोयणसयाई आयामविक्खंभेणं पण्णत्ता एवं चित्त-विचित्तका विभाणियव्वा ।
सव्वे वि णं वट्टवेयड्ढपव्वया दस दस जोयणसयाई उड्ढं उच्चतेणं पण्णत्ता, दस दस गाउयसयाइं उव्वेहेणं पण्णत्ता, मूले दस दस जोयणसयाई विक्खंभेणं पण्णत्ता, सव्वत्थ समा पल्लगसंठाणसंठिया पण्णत्ता ।
सव्वे वि णं हरि-हरिस्सहकूडा वक्खारकूडवज्जा दस दस जोयणसयाइं उड्ढं उच्चत्तेणं पण्णत्ता, मूले दस जोयणसयाइं विक्खंभेणं पण्णत्ता । एवं बलकूडा वि णंदणकूडवज्जा |
अरहा णं अरिट्ठणेमी दस वाससयाइं सव्वाउयं पालइत्ता सिद्धे जाव सव्वदुक्खप्पहीणे । पासस्स णं अरहओ दस साइं जिणाणं होत्था । पासस्स णं अरहओ दस अंतेवासीसयाइं कालगयाई जाव सव्वदुक्खप्पहीणाई।
पउमद्दह-पुंडरीयद्दहा य दस दस जोयणसयाई आयामेणं पण्णत्ता ॥ १०००॥
अणुत्तरोववाइयाणं देवाणं विमाणा एक्कारस जोयणसयाई उड्ढं उच्चत्तेणं पण्णत्ता । पासस्स णं अरहओ इक्कारस सयाइं वेउव्वियाणं होत्था ॥११००॥
महापउम-महापुंडरीयदहा य दो-दो जोयणसहस्साइं आयामेणं पण्णत्ता ॥२०००॥
60
