Page Text
________________
समवायांग सूत्र समणस्स णं भगवओ महावीरस्स चत्तारि सया वाईणं सदेवमणुया-सुरंमि लोगंमि वाए अपराजियाणं उक्कोसिया वाइसंपया होत्था ॥४००॥
अजिते णं अरहा अद्धपंचमाइं धणुसयाई उड्ढं उच्चत्तेणं होत्था । सगरे णं राया चाउरंतचक्कवट्टी अद्धपंचमाइं धणुसयाई उड्ढं उच्चत्तेणं होत्था ॥४५०॥ सव्वे वि णं वक्खारपव्वया सीआ-सीओआओ महाणईओ मंदर-पव्वयंते णं पंच पंच जोयणसयाई उड्ढं उच्चत्तेणं पंच पंच गाउयसयाइं उव्वहेणं पण्णत्ताओ। सव्वे वि णं वासहरकूडा पंच पंच जोयणसयाइं उड्ढं उच्चत्तेणं होत्था, मूले पंच पंच जोयणसयाई विक्खंभेणं पण्णत्ता । उसभे णं अरहा कोसलिए पंच धणुसयाई उड्ढं उच्चत्तेणं होत्था । भरहे णं राया चाउरंतचक्कवट्टी पंच धणुसयाई उड्ढं उच्चत्तेणं होत्था । सोमणस-गंधमादण-विज्जुप्पभ-मालवंताणं वक्खारपव्वयाणं मंदर-पव्वयंतेणं पंच पंच जोयणसयाई उड्ढं उच्चत्तेणं, पंच पंच गाउयसयाइं उव्वेहेणं पण्णत्ता | सव्वे वि णं वक्खारपव्वयकूडा हरिहरिस्सहकूडवज्जा पंच पंच जोयणसयाइं उड्ढे उच्चत्तेणं, मूले पंच पंच जोयणसयाई
वक्खंभेणं पण्णत्ता | सव्वे वि णं णंदण कूडा बलकूडवज्जा पंच पंच जोयणसयाई उड्ढं उच्चत्तेणं, मूले पंच पंच जोयणसयाइं आयामविक्खंभेण पण्णत्ता । सोहम्मीसाणेसु कप्पेसु विमाणा पंच पंच जोयणसयाई उड्ढं उच्चत्तेणं पण्णत्ता ||५००॥ सणंकुमार-माहिंदेसु कप्पेसु विमाणा छजोयणसयाई उड्ढं उच्चत्तेणं पण्णत्ता । चुल्लहिमवंतकूडस्स उवरिल्लाओ चरमंताओ चुल्लहिमवंतस्स वासहरपव्वयस्स समधरणितले एस णं छजोयणसयाइं अबाहाए अंतरे पण्णत्ते। एवं सिहरीकूडस्स वि | पासस्स णं अरहओ छ सया वाईणं सदेवमण्यासुरे लोए वाए अपराजिआणं उक्कोसिया वाइसंपया होत्था । अभिचंदे णं कुलगरे छ धणुसयाई उड्ढं उच्चत्तेणं होत्था | वासुपुज्जे णं अरहा छहिं पुरिससएहिं सद्धिं मुंडे भवित्ता अगाराओ अणगारियं पव्वइए ॥६००॥ बंभ-लंतएसु दोसु कप्पेसु विमाणा सत्त सत्त जोयणसयाई उड्ढे उच्चत्तेणं पण्णत्ता | समणस्स णं भगवओ महावीरस्स सत्त वेउव्वियसया होत्था। अरिट्ठणेमी णं अरहा सत्त वाससयाई देसूणाई केवलपरियाग पाउणित्ता सिद्धे जाव सव्वदुक्खप्पहीणे । महाहिमवंतकूडस्स णं उवरिल्लाओ चरिमंताओ महाहिमवंतस्स वासहरपव्वयस्स समधरणितले एस णं सत्त जोयणसयाइं अबाहाए अंतरे पण्णत्ते । एवं रुप्पिकूडस्स वि ॥७००॥ महासुक्क-सहस्सारेसु रदोसु कप्पेसु विमाणा अद्वजोयणसयाइं उड्ढे उच्चतेणं पण्णत्ता । इमीसे णं रयणप्पभाए पुढवीए पढमे कंडे अट्ठसु जोयणसएसु वाणमंतर भोमेज्जविहारा पण्णत्ता | समणस्स णं भगवओ महावीरस्स अट्ठसया अणुत्तरोववाइयाणं देवाणं गइकल्लाणाणं ठिइकल्लाणाणं आगमेसिभद्दाणं उक्कोसिआ अणुत्तरोववाइयसंपया होत्था ।
| SR No. | 009904 |
| Book Title | Agam 04 Ang 04 Samvayang Sutra Mool Sthanakvasi |
| Original Sutra Author | Sudharmaswami |
| Author | Devardhigani Kshamashaman |
| Publisher | Global Jain Agam Mission |
| Publication Year | 2012 |
| Total Pages | 95 |
| Language | Prakrit |
| Classification | Book_Devnagari, Agam, Canon, & agam_samvayang |
| File Size | 4 MB |