Page Text
________________
आचारांग सूत्र - बीओ सुयखंधो
तओ णं समणस्स भगवओ महावीरस्स अम्मापियरो एयमद्वं जाणित्ता णिव्वत्तदसाहसि वोक्कंतंसि सुचिभूयंसि विउलं असण-पाण- खाइम- साइमं उवक्खडावेति । विउलं असण-पाण-खाइम-साइमं उवक्खडावेत्ता मित्त-णाइ सयण- संबंधिवग्गं उवणिमंतेंति उवणिमंतेत्ता बहवे समण-माहण-अतिहिकिवण- वणीमग- भिच्छंडग-पंडरगाईणं विच्छडडेति, विग्गोवेंति, विस्साणेति, दायाएस् णं दायं पज्जाभाएंति । विच्छड्डित्ता, विग्गोवित्ता, विस्साणित्ता दायाएस् णं दाणं पज्जभाएत्ता मित्त-णाइसयण-संबंधिवग्गं भुंजावेंति मित्त-णाइसयण-संबंधिवग्गं भुंजावित्ता, मित्तणाइ-सयण- संबंधिवग्गेण इमेयारूवं णामधेज्जं कारवेंति-जओ णं पभिइ इमे कुमारे तिसलाए खत्तियाणीए कुच्छिंसि गब्भे आहुए तओ णं पभिई इमं कुलं विउलेणं हिरण्णेणं सुवण्णेणं धणेणं धण्णेणं माणिक्केणं मोत्तिएणं संख-सिल- प्पवालेणं अईव-अईव परिवडढइ, तो होउ णं कमारे वद्धमाणे ।
९ | तओ णं समणे भगवं महावीरे पंचधाइपरिवुडे, तं जहा- खीरधाइए, मज्जण- धाईए, मंडावणधाईए,
खेल्लावणधाईए, अंकधाईए, अंकाओ अंकं साहरिज्जमाणे रम्मे मणिकोट्टिमतले गिरिकंदरसमल्लीणे व चंपयपायवे अहाणुपुव्वीए संवड्ढइ । तओ णं समणे भगवं महावीरे विण्णायपरिणयए विणियत्तबालभावे अप्पुस्सुयाइं उरालाई माणुस्सगाई पंचलक्खणाइं कामभोगाइं सद्द-फरिस-रस-रूव गंधाइं परियारेमाणे एवं च णं विहरइ। समणे भगवं महावीरे कासवगोत्ते, तस्स णं इमे तिण्णि णामधेज्जा एवमाहिज्जंति, तं जहाअम्मापिउसंतिए वद्धमाणे, सहसम्मुइए समणे, भीमं भयभेरवं उरालं अचेलयं परीसहं सहइ त्ति कट्ट देवेहिं से णामं कयं समणे भगवं महावीरे ।
समणस्स णं भगवओ महावीरस्स पिआ कासवगोत्तेणं | तस्स णं तिणि णामधेज्जा एवमाहिज्जंति, तं जहा- सिद्धत्थे ति वा सेज्जंसे ति वा जसंसे ति वा । समणस्स णं भगवओ महावीरस्स अम्मा वासिट्ठसगोत्ता । तीसे णं तिण्णि णामधेज्जा एवमाहिज्जति, तं जहा- तिसला ति वा विदेहदिण्णा ति वा पियकारिणी ति वा । समणस्स णं भगवओ महावीरस्स पित्तियए सुपासे कासवगोत्तेणं।
समणस्स णं भगवओ महावीरस्स जेटे भाया णंदिवद्धणे कासवगोत्तेणं । समणस्स णं भगवओ महावीरस्स जेट्ठा भइणी सुदंसणा कासवगोत्तेणं । समणस्स णं भगवओ महावीरस्स भज्जा जसोया कोडिण्णा गोत्तेणं । समणस्स णं भगवओ महावीरस्स धूया कासवगोत्तेणं | तीसे णं दो णामधेज्जा एवमाहिज्जंति, तं जहा- अणोज्जा ति वा पियदंसणा ति वा । समणस्स णं भगवओ महावीरस्स णत्तुई कोसियगोत्तेणं । तीसे णं दो णामधेज्जा एवमाहिज्जंति, तं जहा- सेसवती ति वा जसवती ति वा । समणस्स णं भगवओ महावीरस्स अम्मापियरो पासावच्चिज्जा समणोवासगा यावि होत्था । ते णं बहूई वासाइं समणोवासगपरियागं पालइत्ता छण्हं जीवणिकायाणं सारक्खणणिमित्तं आलोइत्ता णिंदित्ता गरहित्ता पडिक्कमित्ता अहारिहं उत्तरगुणं पायच्छित्तं पडिवज्जित्ता कुससंथारं दुरुहित्ता
99
| SR No. | 009901 |
| Book Title | Agam 01 Ang 01 Acharanga Sutra Mool Sthanakvasi |
| Original Sutra Author | Sudharmaswami |
| Author | Devardhigani Kshamashaman |
| Publisher | Global Jain Agam Mission |
| Publication Year | 2012 |
| Total Pages | 116 |
| Language | Prakrit |
| Classification | Book_Devnagari, Agam, Canon, & agam_acharang |
| File Size | 4 MB |