________________
[३९४]
अत्थि य वच्छाविसए, कोसंबिपुरीए माणभंगनिवो । तह जिणदत्तो नामो, निगमो सुस्सावओ वसइ ।। तस्स य जाया जिणधम्मचारिणी रूव-सीलसंपन्ना । नामेण वसुमई वरसुआ य पियदंसणा नाम ॥ विज्जाहरंगयसुया, अत्थि सु(स)ही तीए बीयदु(जि)यं व । जिणसासणाणुरत्ता, नामेण मियंकलेह त्ति ।। तीए सह निव्वुयाए, धम्मकहा-भावणाए वच्चंति । दियहा जिणपूयाए, सफला विणएण य गरूणं ।। अह अण्णया य सम्मं, अटुंगनिमित्तमुणियसारेणं । गोयरगएण मुणिणा, कहं वि पियदंसणा दिट्ठा ॥ तं पेच्छिऊण कहियं, बीयस्स मुणिस्स तेण - 'वरकन्ना । एसा जणिऊण सुयं, पव्वज्जं संपवज्जिहिही' ॥ आयण्णियं च सम्मं, मुणिवइवयणं मियंकलेहाए । सोऊण साऽवि हिट्ठा, ठिया य तुण्हिक्काण(क्कया) चेव ॥ मुणिऊण य धणवइणा, विवाहे(ह)जोग्गमहु(ह) बंधुयत्तं सु(च?) । वसुनंदस्स य वरिया, नायपुरिनिवासिणो धूया । नामेण चंदलेहा, तेण वि कलिऊण एस जोग्गो त्ति । आपुच्छिय नियसयणे, विहिणा य निवेइया ताहे ॥ पाणिग्गहणं च तओ, पसत्थनक्खत्त-तिहि-मुहुत्तंमि । सम्माणियपणइयणं, ताणं निव्वत्तियं विहिणा ॥ कंकणविभूसियकरं, डक्का भुयएण बीयदियहमि । रयणीए चंदलेहा, अत्थमिया चंदलेह व्व ॥ तस्स अन्नाओ वेवं, कम्म विपरिणामओ सुरूवाओ । जायाओ वावेज्जा(वावन्ना?), णंतरसेसेसु वि दिणेसु ॥ नाओ य सव्वलोए, 'एस जुवा कालकूडहत्थो'त्ति । न लहइ बहुविहवेण वि, अन्नं कन्नं विमग्गंतो ॥ ताहे इय चिंतेतो, 'वरविलयारयणरहियविहवस्स । किं जीएणं मज्झं, नियत्तजियलोयसार(रे)ण ?' || तंबोल-पुप्फ-कुंकुम-गंधायरुविविहपरियणविरत्तो । परिजिज्झइ अणुदियह, निसिनाहो किण्हपक्खे व्व । तं पेच्छिऊण पिउणो, चिंता जाया 'कहं नु एयं ?'ति । 'सोगानलसंतत्तो, एस सुओ मे विवज्जिहिइ ॥ ता विज्झवेमि सिग्धं, वावारजलेण' चिंतिउं चेमं । तेण सुओ सद्दाविय, भणिओ भणियव्वकुसलेणं ॥
