________________
[ २५३ ]
तह वि तुह अत्थि एक्को, एत्थुप्पाओ इमंमि पइदियहं । आगच्छइ गोहा [ किर], [स-रस ] उदयपाणत्थं ॥ तीए पुच्छविलग्गो, जइ वच्चसि तो गओ तुमं णामं (बाहिं ? ) । अहव न गच्छसि; निहणं, एत्थेव तुमं पि पावेसि' ॥ सुणिऊण इमं तुट्ठो, अहं पि वणिभासियं तयं तत्थ । चिट्ठामि बिले घोरे, जिणनवकारं गुणेमाणो ॥ अह सो वि तत्थ वणिओ, पंचत्तं उवगओ रसपरद्धो । अहमवि बिलसंभीओ, समरत्तंधाह (धो) विचिट्ठामि ॥ तत्तो कयाइ सद्दो, अल्लियमाणाए तीए मुणिऊण । भीओ 'किं होज्ज इमं', नायं च तओ जहा गोहा ॥ पणओ जिणाण तत्तो, समागया सा वि तत्थ पाणत्थं । निग्गच्छंती गहिया, दोहिं [हत्थेहिं] पुच्छंमि ॥ तं जीवियआसाए, पुच्छं न मुयामि सा वि विवरेण । संकड्डिऊण कह वि हु, नीहरिया दुग्गमबिलाओ ॥ पुणरुत्तं मन्नतो, नियजम्मं तत्थ हरिसिओ गाढं । दट्ठूण जीवलोयं, चिंतामि य जीविओ नूणं ॥ मुक्का सा पुच्छाओ, निब्भररहसेण पुलइयंगेण । तत्तो मुच्छाविहलो, धरणीए निवडिओ सहसा ॥ संपत्तचेयणो पुण, इओ तओ तत्थ परिभमेमाणो । अडविमहिसेण दिट्ठो, जगडिज्जंतो तओ तेण ॥ भीओ सिलमारूढो, विहुणइ अह सो वि लं (तं) सिलं रुट्ठो । सिंगग्गेण सिरेण य, अह सो गहिओ अयगरेणं ॥ जुज्झंताणं [ताणं], उत्तरिउं कह वि अह पलाणोऽहं । पत्तो य भीयभीओ, अडवीपच्चंतगामंमि ॥ वणिजागरण दिट्ठो, मामगमित्तेण रुद्ददत्तेण । परिचारिओ य तेणं, जाओ य पुणण्णवो अहयं ॥ तत्तो सुवण्णभूमिं, तेण समं अह धणस्स लोभेणं । आलत्तगाइतुच्छं, भंडं गहिऊण संचलिओ ॥ इसुवेगवई णामं, सरिया अह तत्थ सरसमूहेहिं । उत्तरिउं गिरिकूडं तत्तो य कमेण वेत्तवणं ॥ पत्तो ढंकणविसए, अजपहरणे सयंरु (भु ? ) लाजदुगं । घेत्तुं चडिया तेहिं य, वोलीणा दो वि अजपंथं ॥ रुद्ददेवेण तोऽहं भणिओ 'नेत्तो वि दुग्गमे पंथे । मित्त ! गंतुं समत्था, पाएण; तेणिमे छगले ॥
-
