________________
[१९९]
NNNNNNNNNNNNNNNNNNNNNNNNNNNN
मुक्को य कुंभयण्णो, इंदइ-घणवाहणो तहऽण्णे वि । जे के वि आसि बद्धा, वयणेणं रामदेवस्स ॥ सव्वेहिं तओ मिलिउं, कप्पूरागरु-तुरुक्क-कठेहिं । गोसीसचंदणेण य, विहिओ दहवयणसक्कारो ॥ तत्तो ते पउमसरं, पउमाईया नरीसरा गंतुं । ण्हाया जलंजलीओ, रक्खसवइणो पयच्छंति ॥ कयमयकिच्चेहिं तओ, भणिया ते कुंभयन्नमाईया । रामेण लक्खणेण य, - 'भुंजह निययाई रज्जाई' ॥ इय राम-लक्खणेहिं, भणिया ते बेंति - 'न अम्ह रज्जेणं । कज्जं; विसयविरत्ता, पव्वज्जं संगहिस्सामो ॥ एत्थंतरंमि पत्तो, सूरी कुसुमाउहंमि उज्जाणे । संझाए चउनाणी, नामेणं अप्पमेयबलो ॥ तीए चेव निसाए, जाओ सो केवली तओ महिमा । देवेहिं कयाऽऽगंतुं, तत्तो य पहायसमयंमि ॥ तं सोउं संपत्ता, रामाईया विहीसणाईया ।
तेण वि कहिओ धम्मो, सवित्थरो सायरं तेसिं ॥ तओ संजायवेरग्गेहिं पुच्छिओ पुव्वभवो इंदइ-मेहवाहणेहिं । भयवया भणियं – 'सुणेह । अत्थि एत्थ कोसंबी नाम नयरी तीए दो भायरा सहोयरा तुब्भे आसि पढम-पच्छिमाहिहाणाऽऽजम्मदालिद्दिया । अण्णया भवदत्तो नाम तत्थ साहू समागओ । तस्सयासे धम्मं निसामिण संवेगमावन्ना परिच्चइऊण तं दालिदं जाया संजमधारिणो । वोलीणो बहुओ कालो । अण्णया कोसंबीए नयरीए पुणो वि समागएहिं दिट्ठो मयणमहूसवे नंदिघोसो नाम राया इंदमुहीए सह भारियाए ललमाणो उज्जाणे बहुविहकीलाविसेसेहिं । बद्धं च नियाणं पच्छिमसाहुणा तं च दट्टण, जहा – 'हं एएसिं पुत्तो हवेज्जा जइ इमस्स तवस्स पहावो अत्थि। जेणाऽहमवि एवं कीलामि' ।
निवारिओ य साहुजणेण अनियत्तो तस्सऽज्झवसाणस्स मरिऊण नियसमएण उववण्णो इंदमुहीए तणओ तस्स नंदिघोसस्स राइणो पुत्तो रइवद्धणो नाम । वद्धिओ य । संपत्तंमि रज्जे पिया जहा दिट्ठो आसि तहा चिट्ठइ नियाणयवसेण कीलमाणो ।
पढमसाहू वि कयपव्वज्जो पवयणविहिणा मरिऊण जाओ बंभलोए देवो । अवहिणा वियाणिऊण तं पच्छिमसहोयरसाहुं तत्थोववण्णं समागओ चेल्लयरूवेणं बोहणनिमित्तं । दिण्णासणो य उवविट्ठो । साहिओ य तस्स पुव्वभवो । तं च निसामिऊण संजायजाईसरणो भवविरत्तमणो पव्वइओ रइवद्धणो राया। तओ कालं काऊणुववण्णो सो वि तंमि बंभलोए कप्पे देवो ।
तओ चुया समाणा उववण्णा विजए विबुद्धपुरे एक्कोयरा पुणो वि भायरा । परिवाडीए तत्थ विजयवद्धणसूरिसमीवे पव्वइऊणं जाया अच्चुए देवा । तओ चुया लंकाए रामणस्स तुब्भे इंदइमेहवाहणा नाम पुत्ता जाया । इंदुमुही वि जा पच्छिमजीवमाया आसि, सा संसारं भमिऊण तुम्ह जणणी
