Page Text
________________
[ ११६ ]
‘सिरिवद्धणो वि राया सह नियमदत्तवणिणा काऊण जिणदेसियं पव्वज्जं तत्थेव माहिंदे समुववज्जिऊण सुरत्ताए अहाउयक्खएण चुया समाणा अवरविदेहे वीयसोगाए नयरीए वेजयंतस्स राइणो धारिणीए महादेवीए पुत्तत्ताए उववण्णा जयंत- संजयंतनामगा दो वि भायरा । ते य पिउणा सह पव्वा । पिया तवं काऊण सिद्धो । संजयंतो तुमं धरणिंदो जाओ । अहं पि जयंतो त्ति । इमेण य वज्ज (विज्जु) दाढेण ते वइराणुबंधेणिहाऽऽऊण कय (यो) वसग्गोऽहं केवली जाओ' ।
तओ इमं निसामिऊण गओ धरणिदो । विज्जाहरा वि गया सट्ठाणं । जयंतमुणी वि मोक्खं गओ
त्ति ।
तओ विज्जुदाढस्स बहुपुत्ताइपरंपराइ पुणषाणो ( पुण्णघणो ) नाम विज्जाहरराया जाओ । सो य मेहवाहणस्स नियपुत्तस्स करणं उत्तरसेढीए गयणवल्लहनयरसामिणो सुलोयणविज्जाहरस्स धीयं सहस्सलोयणस्स भगिणि कामपडागं नाम जाएइ । न य देइ सुलोयणो नेमित्तिएण सगरचक्कवट्टिणो उवइट्ठ त्ति काउं । तीए य कएणं पुण्णघण- सुलोयणाणं रणं संजायं वावाइओ य सुलोयणो । सहस्सनयणो वि तस्स सुओ तं सहोयरं गहिऊण सपरियणो वेयङ्कं चइऊणाऽऽगओ सगरचक्कवट्टिणो सयासं । दिन्ना सा तस्स सोयरा । सयरेणाऽवि दिण्णाओ तस्स दो वि सेढीओ । जाओ सयलविज्जाहरराया ।
तओ गंतूण वेढियं तं रहनेउरचक्कवालपुरं । नीसरिओ य तस्संमुहो पुन्नघणो । संपलग्गं च जुज्झं। विणासिओ पुण्णघणो । पलाणो मेहवाहणो जणयम्मि निवाइए । तओ वेरिसमूह [वि]त्तासिओ समागओ अजियजिणसमोसरणे सरणकएणं । पणमिऊण य जिणेसरं उवविट्ठो । सहस्सनयणो वि तस्स मग्गलग्गो समागओ । सो वि जिणं नमिउं उवविट्ठो । पुच्छिओ य भगवं गणहरेण तेसिं सपिउ (ऊ)णं वइरकारणं । तओ भगवया भणियं 'निसुणह'
-
—
'आइच्चाभपुरे परिवसंतो भावणो नाम वाणियओ । तस्स कित्तिमई नाम भारिया, हरिदासो पुत्तो । तस्स य दंसिऊण घरविहवं गओ भावणो दिसायत्ताए । सो य हरिदासो जूए हारिऊण सव्वं धणजायं चोरियाए रायहरं पविट्ठो सुरंगाए । भावणो वि समागयं (ओ) जत्तं काऊण । कहियं च भारियाए सुरंगागमणपज्जवसाणं सव्वं तणयचेट्ठियं । सो संभंतो सुयमरणभयाओ सुरंगाए तस्स पिट्ठओ पविट्ठो | तेण य रायपुरिसो त्ति मुणिऊण अंधयारे पहओ मओ य । इमं च वइयरं नाऊण राइणा सो गहियसव्वस्सो निव्विसओ आणत्तो खिज्जिऊण य मओ समाणो सुलोयणो समुववण्णो, भावणो पुण मरिऊण पुण्णघणो जाओ । तेण निमित्तेण य सुलोयणो विणासिओ पुण्णघणं ति ।
एए पुण मेहवाहण - सहस्सनयणा पुव्वि रंभगस्स [ परिव्वायगस्स ] सहावेण दाणधम्मनिरयस्स ससि-आवलि नामममगा(नामगा ? ) दो सीसा अत्थि । तत्थ य विणीयत्तणओ रंभगस्स आवली इट्ठो । काई चाऽऽवलिणा गोधेणुया किणिया । सा य भेयं काऊण गोसामिणा सह गहिया ससिणा । नायवइयराण य परोप्परं तेसिं जायं जुद्धं । तओ मारिओ आवली ससिणा । एवं च वइरभावेण बहुसु भवेसु हिंडित्ता ससिजीवो मेहवाहणो जाओ आवलिजीवो य सहस्सनयणो । रंभगपरिव्वायगजीवो वि दाणप्पभावओ सुहगईसु हिंडित्ता सयरचक्कवट्टी जाओ'त्ति ।
एत्थंतरंमि य, तत्थेव भगवंतसमोसरणे रक्खसदीवाओ समागएणं रक्खसवइणा भीमनामेणं सोउमिमं भणिओ मेहवाहणो जहा • 'सुंदर ! सोहणमणुट्ठियं तए जमजियजिणसरणमागओ । वह ( बहु ) वेरिणो वेयड्ढे ।
-
| SR No. | 009889 |
| Book Title | Kahavali Pratham Paricched Pratham Khand |
| Original Sutra Author | N/A |
| Author | Kalyankirtivijay |
| Publisher | Kalikal Sarvagya Shri Hemchandracharya Navam Janmashatabdi Smruti Sanskar Shikshannidhi Ahmedabad |
| Publication Year | 2012 |
| Total Pages | 469 |
| Language | Hindi, Sanskrit |
| Classification | Book_Devnagari |
| File Size | 2 MB |