________________
३०६]
[ऋषिदत्ताचरित्रसंग्रहः ॥ एत्थंतरम्मि पाणाण मज्झयारम्मि भणियमेगेण। एवंविहमेयाए संभवइ न निग्घिणं कम्मं ॥२५७॥ अन्नं च सूरमिमं (?) गुणकलियं बालियं हणंताणं । केणावि कारणेणं न वहंति करा किमन्नेण? ॥२५८॥ अणुकूलकम्मपरिणामपेरिओ तीए चेव मायंगो । एगो जंपइ जीएण मज्झ जीवउ चिरं एसा ॥२५९॥ तत्तो य तेहिं वुत्ता तुममेएणं विमोइया भद्दे !। गच्छसु जत्थ न नज्जसि जइ पुण तं कह वि दीसिहसि ॥२६०॥ तो राया अम्हाणं कुलसंहारं करिस्सइ पउट्ठो । इय तज्जिऊण पाणा पेयवणाओ नियत्तंति ॥२६१॥ सारिक्खमडयमत्थयमेगं छेत्तूण दंसियं रन्नो। पच्चयनिमित्तमेत्तो रिसिदत्ता जाइ भयभीया ॥२६२॥ चलियस्स वाउवसओ तरुपत्तस्स वि पकंपमाणमणा । भीसणमसाणमझे धीराण वि ताससंजणए ॥२६३॥ एगागिणी असरणा धीरत्तणवज्जिया सहावेण । पयचारेणं गच्छइ सिरीसपुष्पं व सुकुमारा ॥२६४॥ न तहा सा दूमिज्जइ नियतणुसुकुमारयाए गच्छंती । जह मिच्छारोवियदूसणेण हिययम्मि भणियं च ॥२६५॥ संतगुणविप्पणासे असंतदोसुब्भवे य जं दुक्खं । तं सोसेइ समुदं किं पुण हिययं मणुस्साणं? ॥२६६॥ अहवा वि भवावट्टम्मि वट्टमाणं सकम्मुणा जीवं ।
तं नत्थि किंपि विसमं जं न सहावइ विही एसो ॥२६७॥ तथा हि- एयम्मि पराहुत्ते जियाण जणओ वि वइरिओ होइ ।
बहदुक्खलक्खजणणी जणणी वि हु जायए वग्घी ॥२६८॥ मित्तो वि सत्तुभावं पडिवज्जइ संपया वि विवयसमा । सच्चं पि होइ अलियं नओ वि अनओ गुणो दोसो ॥२६९॥ एवं परिभावंती विसन्नहियया विमूढदिसियक्का । दक्खिणदिसाए चलिया साहसमवलंबिय मणागं ॥२७०॥ कत्थवि य वीसमंती तरुवरछायासु कयफलाहारा । विसहंती तिस-भुक्खं निवसंती देसियकुडीसु ॥२७१॥ पत्ता पभूयकालेण कह वि किच्छेण तम्मि चेव वणे । दट्ठण तं पएसं जणयं सरिउं गया मुच्छं ॥२७२॥ हा ताय ! किं न पेच्छसि नियदुहियं निवडियं दुहसमुद्दे ? । संभाससि किं न तुमं? तुह पाणपिया अहं आसि ॥२७३॥
D:\chandan/new/datta-p/pm5\2nd proof
