________________
परिशिष्टम् [ २ ] ऋषिदत्ताख्यानकम् ॥ ]
पाणेहिं वज्झमंडणपुव्वं सा विनडिऊण नयरीए । नीया निद्दयाहियएहिं तेहिं भीमे मसाणम्मि ॥२४१ ॥ कत्थइ भल्लुंकियरुद्दसद्दविद्दवियकायरजणोहं । कत्थवि य कूरकोल्हुयदाढाविक्कत्तियकरंकं ॥ २४२ ॥ कत्थवि य मडयवस-मंसपुट्टवेयालभूरिभयजणयं । कत्थवि य विहियसंकुद्धसाइणीकिलिकिलारावं ॥२४३॥ कत्थवि य पयडडज्झंतमडयदुग्गंधभरियदिसिविवरं । कत्थवि य दूरमुब्भवियबाहुनच्चंत भूयगणं ॥ २४४॥ कत्थवि य वीरविक्किज्जमाणनियदेहमंसखंडलयं । कत्थवि कावालियकीरमाणवरविज्जसाहणयं ॥ २४५ ॥ इय एरिसविहभीसणमसाणमज्झम्मि मुक्किया बाला । सुमरिय कुमरं पलवइ पमुक्कलल्लक्कपोक्कारं ॥२४६॥ हा पाणदइय ! हा अमयमइय ! हा निद्धहियय ! हा नाह ! । हा जीवियसम ! हा परममहिम ! हा पत्तजयपउम ॥२४७॥ सुसरय ! तुमं पि सहसा संजाओ कीस निग्घिणो ? कहसु । एक्क च्चिय पाणपिया जेणाहं तुज्झ सुयभज्जा ॥ २४८ ॥ कत्तो वि हु आगंतुं मंभीससु संपयं तुमवि ताय ! । आजम्मं पाणपिया जेणाहं तुज्झ नियधूया ॥२४९॥ हा माए ! माए ! पियमइ ! कुओ वि सग्गालयाओ आगंतुं । भयसंभंतमसरणं परितायसु दुहियरं दुहियं ॥ २५० ॥ इय एवं विलवंती भीया भयभेरवे मसाणम्मि । तायारमविंदंती पडिया वसणंधकूवम्मि ॥ २५१ ॥ तयणंतरमन्नुब्भडभिउडीभासुरनिडालवट्ठेहिं । उक्खायनिसियकत्तियविहत्थहत्थेहिं पाणेहिं ॥ २५२ ॥ आ पावे ! कूडकुहेडगाइदोसेहिं भरिय ! हयहियए ! । भक्खसि रन्नो पुरिसे मारेउं रोवसि इयाणि ॥ २५३॥ मेरे रे ! एयाए पावियो निक्करुणकूरहिययाए । छिंदह नासा-कन्ने खग्गेणं लुणह सिरकमलं ॥२५४॥ एवं भीसणवयणेहिं तेहिं निब्भच्छिया विवन्नमुही । खरपवणाहयतरुवरलय व्व परिकंपिउं लग्गा ॥ २५५ ॥ हा ताय ! ताय ! हा भाय ! भाय ! मा हणह पायवडिया हं । घेत्तूणाऽऽहरणाई कुणह दयं मुयह जीवंती ॥ २५६॥
१. मच्चभुयभिउडी० रं० ।
D:\chandan/new/datta-p/pm 5 \ 2nd proof
[ ३०५
