________________
[२९५
परिशिष्टम् [२] ऋषिदत्ताख्यानकम् ॥]
सुरवइसावादुत्तोलियं व सग्गंगणा [ पुढवि ] वासं । रमणीयवणे रमणत्थमागयं नायकन्नं व ॥७२॥ उज्जाणनिवासिणिदेवयं व सुंदरसरोवरसिरिं व । तत्थतवोवणलच्छि व ललियविज्जाहरसुयं व ॥७३॥ तीए य रूव-लायन्नपुन्नतारुन्नमणभवणो । जा नियइ तयं निष्फंदलोयणो वणलयंतरिओ ॥७४॥ ताव सहस त्ति निप्पुन्नपुरिससंपत्तभवणलच्छि व्व । कत्थ वि गया न नज्जइ सपिवासस्स वि कुमारस्स ॥७५॥ तत्तो तट्ठाणाओ अट्ठेउं विसइ देवकुलियाए। दिट्ठो य तत्थ कुमरेण मणहरो तावसो एंतो ॥७६॥ सणियमहामहदिट्ठी जराए जज्जरियसिढिलसव्वंगो। सारयससहरनिप्पंकपलियसंपुनपुन्नतणू ॥७७॥ उब्बद्धजडाजूडो पभूयफल-पुप्फसिरिसमाउत्तो । सउणसमस्सियमुत्ती पच्चक्खो कप्परुक्खो व्व ॥७८॥ निब्भिच्चसमुद्धूलियदेहो सरयब्भ [ सरिस ] भूईए । नं नज्जइ सव्वंगं समस्सिओ पुन्नलच्छीए ॥७९॥ विप्फुरियासमसत्ती रवि व्व पयडियपयत्थसब्भावो । सुहसोमयाए भवणं अमयकरो सारयससि व्व ॥८॥ पालियनियमज्जाओ बहुसत्तसमस्सिओ जलनिहि व्व । मेरु व्व गरुयमुत्ती गिरिपवरो लोयमज्झत्थो ॥८१॥ पच्चासन्ने पत्तो सहसा अब्भुट्ठिओ कुमारेण । पणमिय पाए भणियं भयवं ! वड्ढउ तवो तुज्झ ॥८२॥ सुहभागी होसु तुम कुमार ! दाऊणमेवमासीसं । उवविठ्ठो वित्थारियसियपउमे रायहंसो व्व ॥८३॥ कुमरो वि हु तप्पुरओ पवित्तपउमासणे समासीणो । पुट्ठो य तावसेणं कुमार ! कत्तो तुहागमणं ? ॥८४॥ कत्थ वि किर गंतव्वं? इय पुढे तेण पणइपवणेणं । सव्वो नियवुत्तंतो कहिओ कणगरहकुमरेण ॥८५॥ तो तावसेण भणियं वट्टइ देवच्चणस्स मह वेला । इय जंपियम्मि मुणिणा पणमित्तु समुट्ठिओ कुमरो ॥८६॥ तं चेव कन्नयं नियइ निद्धनयणेहिं तरुलयंतरिओ। पेच्छइ भक्खंतिं वणफलाणि सह तावसेण तयं ॥८७॥ खणदिट्ठनट्ठरूवं एवं तं पइदिणं पि पेच्छंतो । अच्चणियं कुणमाणो निरंतरं देवकुलियाए ॥८८॥
D:\chandan/new/datta-p/pm5\2nd proof
