________________
ਰਾਜੇ ਨੇ ਬੜੇ ਧਿਆਨ ਨਾਲ ਆਪਣੀ ਰਾਣੀ ਦੇ ਚਿੱਤਰ ਨੂੰ ਵੇਖਿਆ ਸਭ ਕੁੱਝ ਠੀਕ ਸੀ। ਅਚਾਨਕ ਹੀ ਉਸ ਦੀ ਨਜ਼ਰ ਸੱਜੇ ਪੱਟ ਉੱਪਰ ਇੱਕ ਰੰਗ ਦੇ ਛਿੱਟੇ ਉੱਪਰ ਪਈ। ਇਹ ਵੇਖ ਕੇ ਰਾਜੇ ਨੂੰ ਕਰੋਧ ਆ ਗਿਆ। ਜਿਸ ਭੇਦ ਨੂੰ ਪਤੀ ਤੋਂ ਇਲਾਵਾ ਕੋਈ ਨਹੀਂ ਜਾਣਦਾ ਉਹ ਚਿੱਤਰਕਾਰ ਨੇ ਕਿਵੇਂ ਬਣਾ ਦਿੱਤਾ? ਰਾਜੇ ਨੂੰ ਆਪਣੀ ਪਤਨੀ ਦੇ ਚਰਿੱਤਰ ‘ਤੇ ਸ਼ਕ ਹੋ ਗਿਆ, ਪਰ ਉਸ ਨੇ ਜ਼ਾਹਰ ਨਹੀਂ ਕੀਤਾ। ਉਸ ਨੇ ਚਿੱਤਰਕਾਰ ਨੂੰ ਮੌਤ ਦੀ ਸਜਾ ਸੁਣਾਈ। ਮੰਤਰੀ ਨੇ ਰਾਜੇ ਨੂੰ ਸਮਝਾਉਣ ਲਈ ਆਖਿਆ, “ਮਹਾਰਾਜ ! ਇਸ ਵਿੱਚ ਚਿੱਤਰਕਾਰ ਦਾ ਕੋਈ ਦੋਸ਼ ਨਹੀਂ ਕਿਉਂਕਿ ਉਸ ਨੂੰ ਦੇਵਤੇ ਵੱਲੋਂ ਇਹ ਵਰਦਾਨ ਹਾਸ਼ਲ ਹੈ ਕਿ ਉਹ ਕਿਸੇ ਮਨੁੱਖ ਦਾ ਕੋਈ ਇੱਕ ਅੰਗ ਵੇਖ ਕੇ ਉਸ ਦਾ ਪੂਰਾ ਚਿੱਤਰ ਤਿਆਰ ਕਰ ਸਕਦਾ ਹੈ”।
ਮੰਤਰੀ ਦਾ ਆਖਾ ਮੰਨ ਕੇ ਚਿੱਤਰਕਾਰ ਦੇ ਦੋਹਾਂ ਹੱਥਾਂ ਦੇ ਅੰਗੂਠੇ ਕਟਵਾ ਦਿੱਤੇ ਅਤੇ ਉਸ ਨੂੰ ਦੇਸ਼ ਨਿਕਾਲਾ ਦੇ ਦਿੱਤਾ। ਹੁਣ ਚਿੱਤਰਕਾਰ ਨੂੰ ਬਹੁਤ ਗੁੱਸਾ ਆਇਆ ਉਸ ਨੇ ਰਾਜੇ ਤੋਂ ਅਪਮਾਨ ਦਾ ਬਦਲਾ ਲੈਣ ਲਈ ਇੱਕ ਯੋਜਣਾ ਬਣਾਈ। ਉਸ ਨੇ ਫਿਰ ਆਪਣੀ ਦੇਵ ਸ਼ਕਤੀ ਨਾਲ ਮਿਰਗਾਵਤੀ ਦਾ ਇੱਕ ਚਿੱਤਰ ਤਿਆਰ ਕੀਤਾ। ਉਹ ਚਿੱਤਰ ਲੈ ਕੇ ਅਵੰਤੀ ਦੇਸ਼ ਦੇ ਰਾਜਾ ਚੰਡ ਪ੍ਰਦੋਤਨ ਕੋਲ ਆ ਗਿਆ। ਰਾਜੇ ਨੂੰ ਆਪਣੀ ਰਚਨਾ ਭੇਂਟ ਕੀਤੀ, ਰਾਜਾ ਸੁੰਦਰ ਚਿੱਤਰ ਵੇਖ ਕੇ ਹੈਰਾਨ ਹੋ ਗਿਆ। ਉਸ ਨੇ ਚਿੱਤਰਕਾਰ ਤੋਂ ਪੁੱਛਿਆ ਕਿ ਇਹ ਰਾਜਕੁਮਾਰੀ ਕਿਸ ਦੇਸ਼ ਦੀ ਹੈ। ਚਿੱਤਰਕਾਰ ਨੇ ਆਖਿਆ, “ਮਹਾਰਾਜ! ਇਹ ਰਾਜਾ ਸ਼ਤਾਨਿਕ ਦੀ ਰਾਣੀ ਮਿਰਗਾਵਤੀ ਦਾ ਚਿੱਤਰ ਹੈ। ਇਸ ਸੁੰਦਰੀ ਨੂੰ ਪ੍ਰਾਪਤ ਕਰਨਾ ਹਰ ਇੱਕ ਦਾ ਕੰਮ ਨਹੀਂ ਇਸ ਲਈ ਤੁਹਾਨੂੰ ਖੂਨ ਪਸੀਨਾ ਇੱਕ ਕਰਨਾ ਪਵੇਗਾ। ਕਿਉਂਕਿ ਰਾਜਾ ਸ਼ਤਾਨਿਕ ਵੀ ਯੁੱਧ ਕਲਾ ਵਿੱਚ ਮਹਾਨ ਯੋਧਾ ਹੈ। ਉਹ ਆਸਾਨੀ ਨਾਲ ਤੁਹਾਨੂੰ ਅਪਣੀ ਰਾਣੀ ਭੇਂਟ ਨਹੀਂ ਕਰੇਗਾ”।
[104]
