________________
24
ਸਤੀ ਮਿਰਗਾਵਤੀ
ਮਿਰਗਾਵਤੀ ਵੀ ਵੈਸ਼ਾਲੀ ਦੇਸ਼ ਦੇ ਰਾਜਾ ਚੇਟਕ ਦੀ ਪੁੱਤਰੀ ਸੀ। ਉਹ ਬਚਪਨ ਤੋਂ ਰਾਜਸੀ ਠਾਠ ਦੇ ਨਾਲ ਨਾਲ ਧਾਰਮਕ ਸੰਸਕਾਰਾਂ ਵਿੱਚ ਪਲੀ ਸੀ। ਰਾਜਾ ਨੂੰ ਉਸ ਲਈ ਯੋਗ ਕੋਈ ਵਰ ਨਹੀਂ ਸੀ ਮਿਲ ਰਿਹਾ, ਬੜੀ ਲੰਬੀ ਤਲਾਸ਼ ਤੋਂ ਬਾਅਦ ਕੋਸਾਂਭੀ ਦੇਸ਼ ਦੇ ਰਾਜਕੁਮਾਰ ਸ਼ਤਾਨਿਕ ਉਸ ਨੂੰ ਯੋਗ ਵਰ ਦੇ ਰੂਪ ਵਿੱਚ ਮਿਲ ਗਿਆ। ਰਾਜਕੁਮਾਰੀ ਦੀ ਸ਼ਾਦੀ ਸ਼ਾਹੀ ਠਾਠ ਨਾਲ ਹੋਈ। ਪਿਤਾ ਨੇ ਆਪਣੀ ਪੁੱਤਰੀ ਨੂੰ ਸ਼ੁਭ ਮਹੂਰਤ ਵਿੱਚ ਰਾਜਕੁਮਾਰ ਸ਼ਤਾਨਿਕ ਨਾਲ ਵਿਦਾ ਕੀਤਾ।
ਕੋਸਾਂਭੀ ਆ ਕੇ ਕੁੱਝ ਸਮਾਂ ਬਾਅਦ ਸ਼ਤਾਨਿਕ ਰਾਜਾ ਬਣਿਆ ਤੇ ਮਿਰਗਾਵਤੀ ਪਟਰਾਣੀ ਬਣੀ। ਮਿਰਗਾਵਤੀ ਰਾਜਾ ਨੂੰ ਬਹੁਤ ਪਿਆਰੀ ਸੀ, ਇਸ ਲਈ ਉਸ ਨੇ ਆਪਣੀ ਪਟਰਾਣੀ ਦੇ ਰਹਿਣ ਲਈ ਇਕ ਸੁੰਦਰ ਮਹਿਲ ਤਿਆਰ ਕਰਵਾਉਣਾ ਸ਼ੁਰੂ ਕੀਤਾ। ਜੋ ਬਗੀਚਿਆਂ ਨਾਲ ਘਿਰਿਆ ਹੋਇਆ ਸੀ। ਮਹਿਲ ਵਿੱਚ ਇੱਕ ਚਿੱਤਰਸ਼ਾਲਾ ਦਾ ਕੰਮ ਸ਼ੁਰੂ ਹੋਇਆ, ਇਹ ਕੰਮ ਜਿਸ ਚਿੱਤਰਕਾਰ ਨੂੰ ਦਿੱਤਾ ਗਿਆ। ਉਸ ਨੂੰ ਦੇਵਤਿਆਂ ਵੱਲੋਂ ਇਹ ਵਰਦਾਨ ਹਾਸਲ ਸੀ। ਉਹ ਕਿਸੇ ਵੀ ਮਨੁੱਖ ਜਾਂ ਵਸਤੂ ਦਾ ਇੱਕ ਅੰਗ ਵੇਖ ਕੇ ਉਸ ਦੀ ਉਸੇ ਪ੍ਰਕਾਰ ਦੀ ਤਸਵੀਰ ਬਣਾ ਸਕਦਾ ਸੀ। ਜਿਸ ਵਿੱਚ ਅਸਲ ਬੰਦੇ ਜਾਂ ਚੀਜ ਦਾ ਕੋਈ ਫਰਕ ਨਜ਼ਰ ਨਹੀਂ ਆਉਂਦਾ ਸੀ। ਚਿੱਤਰਕਾਰ ਨੇ ਅਪਣੇ ਸਾਥੀਆਂ ਨਾਲ ਚਿੱਤਰਸ਼ਾਲਾ ਦਾ ਕੰਮ ਸ਼ੁਰੂ ਕੀਤਾ। ਕੁੱਝ ਸਮੇਂ ਬਾਅਦ ਚਿੱਤਰਸ਼ਾਲਾ ਤਿਆਰ ਹੋ ਗਈ। ਚਿੱਤਰਕਾਰ ਨੇ ਰਾਜਾ ਨੂੰ ਬੇਨਤੀ ਕੀਤੀ ਕਿ ਚਿੱਤਰਸ਼ਾਲਾ ਤਿਆਰ ਹੈ, ਉਹ ਚਿੱਤਰਸ਼ਾਲਾ ਵੇਖਣ ਲਈ ਆਉਣ। ਚਿੱਤਰਕਾਰ ਨੇ ਉਸ ਚਿੱਤਰਸ਼ਾਲਾ ਵਿੱਚ ਮਿਰਗਾਵਤੀ ਦਾ ਚਿੱਤਰ ਵੀ ਤਿਆਰ ਕੀਤਾ ਸੀ, ਚਿੱਤਰਸ਼ਾਲਾ ਦੇ ਦਰਵਾਜੇ ਉੱਪਰ ਸਥਾਪਤ ਕੀਤਾ ਗਿਆ ਸੀ।
[103]
