________________
१६२
भवभावना
तत्तो य निरयपाला, भणंति रे अज्ज दुसहं दुक्खं। जइया पण पावाइं, करेसि तट्ठो तया भणसि॥१२५॥ णत्थि जए सव्वन्न, अहवा अहमेव एत्थ सव्वविऊ। अहवा वि खाह पियह य, दिट्ठो सो केण परलोओ ?॥१२६॥ णत्थि व पुण्णं पावं, भूयऽब्भहिओ य दीसइ न जीवो। इच्चाइ भणसि तइया, वायालत्तेण परितुट्ठो॥१२७॥ मंसरसम्मि य गिद्धो, जइया मारेसि निग्घिणो जीवे। भणसि तया अम्हाणं, भक्खमियं निम्मियं विहिणा॥१२८॥ वेयविहिया न दोसं, जणेइ हिंस त्ति अहव जंपेसि। चरचरचरस्स तो फालिऊण खाएसि परमंसं॥१२९॥ लावयतित्तिरअंडयरसवसमाईणि पियसि अइगिद्धो। इण्डिं पुण पोक्कारसि, अइसहं दुक्खमेयंति॥१३०॥ अलिएहि वंचसि तया कूडक्कयमाइएहि मुद्धजणं। पेसुन्नाईणि करेसि हरिसिओ पलवसि इयाणिं॥१३१॥ तइया खणेसि खत्तं, घायसि वीसंभियं मुससि लोयं। परधणलुद्धो बहुदेसगामनगराइं भंजेसि॥१३२॥ तेणावि पुरिसयारेण विणडिओ मुणसि तणसमं भुवणं। परदव्वाण विणासे, य कुणसि पोक्करसि पुण इण्हि॥१३३॥ मा हरसु परधणाई, ति चोइओ भणसि धिट्ठयाए य। सव्वस्स वि परकीयं, सहोयरं कस्सइ न दव्व।।१३४॥ तइया परजुवईणं, चोरियरमियाइं मुणसि सुहियाई। अइरत्तो वि य तासिं, मारसि भत्तारपमुहे य॥१३५॥ सोहग्गेण य नडिओ, कूडविलासे य कुणसि ताहिं समं। इण्हिं तु तत्ततंबयढिउल्लियाणं पलाएसि॥१३६॥ परकीय च्चिय भज्जा, जुज्जइ निययाइ माइभगिणीओ। एवं च दुव्वियड्ढत्तगव्विओ वयसि सिक्खविओ॥१३७॥ पिंडेसि असंतुट्ठो, बहुपावपरिग्गहं तया मूढो। आरंभेहि य तूससि, रूससि किं एत्थ दुक्खेहिं ?॥१३८॥
