________________
परिशिष्ट १
हत्थे पाए ऊरू, बाहु सिरा तह य अंगुवंगाणि। छिंदंति असी असिमाइएहि निच्चं पि निरयाणं॥१११॥ पत्तधणुनिरयपाला, असिपत्तवणं विउब्वियं काउं । दंसंति तत्थ छायाहिलासिणो जंति नेरइया ॥ ११२॥ तो पवणचलिततरुनिवडिएहिं असिमाइएहिं किर तेसिं। कण्णोट्ठनासकरचरणऊरूमाईणि छिंदंति॥११३॥ कुंभेसु पयणगेसु य, सुंठेसु य कंदुलोहिकुंभी । कुंभीओ नारऍ उक्कलंततेल्लाइसु तलंति॥११४॥ तडयडरवफुट्टंते, चणय व्व कयंबवालुयानियरे । भुंजंति नारए तह, वालुयनामा निरयपाला॥११५॥ वसपूयरुहिरकेसट्ठिवाहिणिं कलयलंतजउसोत्तं । वेयरणिं नाम नई, अइखारुसिणं विउव्वेउं ॥ ११६॥ वेयरणिनरयपाला, तत्थ पवाहंति नारए दुहिए। आरोवंति तहिं पिहु, तत्ताए लोहनावाए॥११७॥ नेरइए चेव परोप्परं पि परसूहिं तच्छयंति दढं। करवत्तेहि य फाडंति निद्दयं मज्झमज्झेणं ॥११८॥ वियरालवज्जकंटयभीममहासिंबलीसु य खिवंति। पलवंते खरसद्दं, खरस्सरा निरयपाल त्ति ॥ ११९॥ पसुणो व्व नारए वहभएण भीए पलायमाणे य। महघोसं कुणमाणा, रुंभंति तहिं महाघोसा॥१२०॥ तह फालिया वि उक्कत्तिया वि तलिया वि छिन्नभिन्ना वि। दड्ढा भुग्गा मुडिया, य तोडिया तह विलीणा य॥१२१॥ पावोदएण पुणरवि, मिलंति तह चेव पारयरसो व्व। इच्छंता वि हु न मरंति कह वि हु ते नारयवराया ॥ १२२॥ पभणंति तओ दीणा, मा मा मारेह सामि ! पहु ! नाह ! अइदुसहं दुक्खमिणं, पसियह मा कुह एत्ताहे ॥ १२३ ॥ एवं परमाहम्मियपाएस पुणो पुणो वि लग्गति । दंतेहि अंगुलीओ, गिण्हंति भांति दीणाइं॥१२४॥
१६१
