________________
સમાધિ મરણ
૨૫ ભવોમાં કરેલી વિરાધના, જીવહિંસાદિ વિચારીને તેનું મિચ્છા મિ દુક્કડમ્ દેવું. તે પ્રથમ પાપસ્થાનક સેવેલ હોય તે વોસિરાવવું.
મેં હિંસા ન કરી હોય પરંતુ મનમાં બીજાને મારી નાખવાના વિચારો કરેલ હોય તેનું મિચ્છા મિ દુક્કડમ્.
બીજાના અંગોપાંગ છેદવાના વિચાર કરેલ હોય તેનું મિચ્છા મિ દુક્કડમ્. બીજા જીવો મરી જાય તેવું વિચાર્યું હોય તેનું મિચ્છા મિ દુક્કડમ્.
મનમાં બીજા જીવોને વિવિધ રીતે યાતના દેવાના, ત્રાસ દેવાના વિચારો કરેલ હોય તેનું મિચ્છા મિ દુક્કડમ્.
મનમાં બીજા જીવો વિવિધ રીતે યાતના પામે, ત્રાસ પામે તેવા વિચારો કરેલ હોય તેની માફી માંગું છું.
વચનો એવા ઉચ્ચારેલ હોય કે, બીજા જીવો ત્રાસ પામે, મરી જાય, બીજા જીવોને મારી નાખવા જોઈએ. જેમની દુષ્ટોને દંડવાની ફરજ છે તે ફરજ ન બજાવતા રાજકર્તાઓને, અમલદારોને મારી નાખવા જોઈએ.
આવું મન-વચન-કાયાથી જે કોઈ હિંસા કરેલ હોય, હિંસાનુબંધી, રોદ્રધ્યાન કરેલ, કરાવેલ તથા અનુમોદેલ હોય તેની હું માફી માંગુ છું. તે પાપસ્થાનક વોસિરાવું
- જેમને આશ્રયીને આવું કરેલ હોય, તેવા જીવો જ્યાં હોય ત્યાં ખૂબ સુખી થાવ. મારે બધા જીવો જોડે મૈત્રી ભાવ રહે.
૨ જું પાપ સ્થાનક મૃષાવાદ દશ વેકાલિક તથા ઠાણાંગ સૂત્રમાં ભાષાના ચાર પ્રકાર બતાવેલ છે. (૧) સત્યા (૨) મૃષા (૩) સત્યામૃષા (૪) અસત્યામૃષા
પૂ. ગણધર શ્રી ગૌતમ સ્વામિ પરમ તારક શ્રી વીર પ્રભુને પૂછે છે કે ભગવંત આ ચાર પ્રકારની ભાષામાં કઈ ભાષા બોલતો જીવ આરાધક અને કઈ ભાષામાં બોલતો જીવ વિરાધક ?
ભગવંત જણાવે છે કે ચારે પ્રકારની ભાષા બોલતો જીવ આરાધક અને ચારે પ્રકારની ભાષા બોલતો જીવ વિરાધક.
