________________
મુનિની ભક્તિપૂર્વક સ્તુતિઃ
શ્રેણિક રાજાઃ ભગવદ્ અનાથતાનું યથાર્થ સ્વરૂપ આપે મને સુંદર રીતે સમજાવ્યું છે. મેં આપને પ્રશ્નો પૂછી આપના ધ્યાનમાં વિઘ્ન કર્યું અને ભોગો ભોગવવા આમંત્રણ આપ્યું, તે બદલ મને ક્ષમા કરો.
મુનિશ્વરના અમૃતમય સમાગમથી રાજા સમ્યકત્વ પ્રાપ્ત કરી, મુનિરાજની પ્રદક્ષિણા કરી, વંદન કરી સ્વસ્થાને પાછા ફર્યા.
અનાથી મુનિ સાધુના ૨૭ ગુણોથી સમૃદ્ધ, ત્રણ ગુપ્તિઓથી ગુપ્ત, ત્રણ દંડોથી વિરત, મોહમુક્ત થઇને આ વસુંધરામાં પક્ષીની જેમ અપ્રતિબદ્ધ થઇને સંયમમાં વિચરણ કરવા લાગ્યા.
ઉપસંહારઃ
જન્મમરણ કરનાર અને વધારનાર અજ્ઞાની પ્રાણીઓ અનાથ ગણાય છે. ધર્મને સમજી, સંયમ સ્વીકારનાર પોતાના અને બીજાના નાથ થઇ જાય છે. સંયમ ગ્રહણ કર્યા પછી સનાથ બનેલા શ્રમણને જિનાજ્ઞા રૂપ સંયમાચારની સમસ્ત વિધિઓનું સારી રીતે પાલન કરવાનું પરમ કર્તવ્ય હોય છે. જે આવા કર્તવ્ય થી ચૂકી જાય, આળસુ કે આરામપ્રિય થઇ જાય તે બીજા પ્રકારના અનાથ થઇ જાય છે કારણકે સંયમધર્મનું બરાબર પાલન ન કરવાથી તે પોતાના આત્માની દુગર્તિથી રક્ષા કરી શકતા નથી.
માટે સંયમાચારનું સંપૂર્ણ પાલન કરીને સાચા સનાથ થવું; એ જ આ અધ્યયનનો સાર છે.
(વીસમું અધ્યયન સંપૂર્ણ) ઉત્તરાધ્યયન સૂત્ર - પ્રથમ ભાગ સંપૂર્ણ
८४
