________________
આ પ્રમાણેના શોકયુક્ત ઉદ્ગાર ભક્તિવંતોના મુખમાંથી નીકળ્યા કરતા હતા. સંસ્કાર થઈ રહ્યા બાદ ચિતા શાંત કરવામાં આવી. શ્રાવકવર્ગ પણ સર્વે સ્નાન કરી એકત્ર થઈ શોકશાંતિનિમિત્તે ઉપદેશ સાંભળવા ઉપાશ્રય ગયો. મુખ્ય શિષ્ય મુનિ ગંભીરવિજયજીનો ઉપદેશ સાંભળી ચિત્ત શાંત કરી સૌ સ્વસ્થાનકે ગયું.
તે દિવસે આખા શહેરમાં હડતાળ પાડવામાં આવી. તમામ પ્રકારના વ્યાપાર બંધ થયા. મીલ, પ્રેસો, કારખાનાઓ, બંદર, મત્યજાળ તેમજ બીજા સર્વ આરંભી કાર્યો બંધ રહ્યા. શ્રાવકવર્ગે એક સારી રકમ એકઠી કરી, તેમાંથી અનેક પ્રકારે અનુકંપાદાન દેવામાં આવ્યું. મહારાજશ્રીના સંસ્કારને સ્થાનકે મહારાજશ્રીની પાદુકાનું સ્થાપન કરવા માટે એક આરસની દેરી બનાવવામાં આવી અને તેમાં સંવત ૧૯૫૦ના શ્રાવણ શુદિ પુનમે મહારાજશ્રીના પગલાં સ્થાપન કરવામાં આવ્યાં. બંને ગુરુભાઈ (મુનિરાજ શ્રીમૂલચંદજી અને વૃદ્ધિચંદ્રજી) એકસાથે પંજાબ દેશમાંથી આ દેશમાં આવેલા, તેમની નિર્વાણભૂમિ પણ એક સ્થાને જ થવી સર્જિત હોવાથી ચાર વર્ષને અંતરે તેમજ બન્યું. બંને મહાત્માઓના સંસ્કારને સ્થાનકે થયેલી બંને દેરીઓ અને તેમાં સ્થાપેલ પાદુકા એકબીજા સાથે પુર્વવત સ્નેહ કરીને રહેલ હોય એમ અદ્યાપિ દાદાસાહેબની વાડીમાં સાથે સાથે શોભી રહી છે.
