Page Text
________________
ઉપર એટલો સ્નેહ હતો કે તેમને મારા વિના એક પળ પણ ચાલતું નહિ. અરે ! શ્રીકૃષ્ણની પત્ની સત્યભામા પણ મારી સાથે ખૂબ પ્રેમાળ સખ્ય રાખતી. મહારાણી દ્રૌપદી પાંડવોની સાથે વનમાં ગયા ત્યારથી હું જેમ તેમ કરીને દિવસો પસાર કરતી આજે અહીં આવી ચડી છું.”
સુદેષ્માએ કહ્યું, “તું હવે મારી પાસે જ રહે. પણ મને ચિંતા એક જ વાતની છે કે તારું રૂપ જોયા પછી રાજા મને સાવ ભૂલી જશે અને તેને પોતાની રાણી બનાવી દેશે.”
સૈરબ્રીમાલિનીએ કહ્યું, “આપ એ વાતની જરાય ચિંતા ન કરો. તેવું કદી બનવાનું નથી, કેમકે મારો એવો પ્રભાવ છે કે મારી તરફ કુનજરથી જે જુએ તેનો નાશ જ થઈ જાય. મારે પાંચ ગાંધર્વપતિઓ છે. તેઓ વિદ્યાબળથી ગુપ્ત રહીને મારી સતત રક્ષા કરે છે.”
આ સાંભળીને નિર્ભય બનેલી સુદૃષ્ણાએ તેને પોતાની સખી તરીકે રાખી લીધી.
સહુ-પાંડવો અને દ્રૌપદી-પોતાના માલિકની પાસેથી સારી રીતે પ્રેમ સંપાદન કરીને આનંદથી રહેવા લાગ્યા.
માતા કુન્તીને તેમણે વિરાટનગરમાં જ કોઈ ઘર લઈને ત્યાં રાખી દીધા હતા. સમય મળે ત્યારે સહુ ખાનગીમાં તેમને અવારનવાર મળી આવતા હતા. એકબીજા પણ ત્યાં મળી લઈને આનંદ માણતા હતા.
આમ કરતાં ગુપ્તવાસના તેરમા વર્ષના અગિયાર માસ સારી રીતે પસાર થઈ ગયા. પોતે પાંડવો છે તે વાતની કોઈને કદી ગંધ પણ આવવા દીધી નહિ. પણ છેલ્લા એક માસમાં મોટી ધમાલ મચી ગઈ.
દ્રોપદીને જોઈને કામુક બનેલો કીચક આ ધમાલનો ખલનાયક હતો; મહારાણી સુદૃષ્ણાનો જ ભાઈ કીચક.
દ્રૌપદી વારંવાર તેની નજરમાં આવતી રહી એથી તેના હૈયામાં કામવાસના પ્રજવલિત થઈ ગઈ.
કામવાસના ત્યાં જલદી જાગે છે જ્યાં તેનો સંપર્ક વધુ વાર થતો હોય છે. જયાં વધુ વખત સંપર્ક નથી ત્યાં જાગેલી પણ કામવાસના વધુ સમય જીવતી રહી શકતી નથી.
જૈન ધર્મના સંસારત્યાગીઓની જે-એક સ્થાને હંમેશ-આશ્રમાદિ કરીને નહિ રહેવાની વ્યવસ્થા છે તે અત્યંત સમુચિત છે. એથી નાહકની ઊભી થઈ જતી-અતિ પરિચયજનિત-આપત્તિઓમાંથી સહજ રીતે ઉગાર મળી જાય છે.
આમેય દ્રૌપદીનું રૂપ તેના અંગેઅંગમાંથી નીતરતું જ હતું અને બીજી બાજુ કીચક કામુક તો હતો જ, એટલે તેના હૈયે કામવાસના ભડકે બળે તેમાં આશ્ચર્ય ન હતું.
એક દિવસ કીચકે સૈરબ્રી (દ્રૌપદી) પાસે દૂતીને મોકલીને કહેવડાવ્યું કે તેનું શરીર ખૂબ અસ્વસ્થ થયું છે માટે તે પોતાના હાથેથી જો સ્પર્શ કરે તો તેના પતિવ્રતાપણાના પ્રભાવથી શરીર સ્વસ્થ બની જાય.
આ કહેણ પાછળનું મલિન બુદ્ધિનું વહેણ સૈરબ્રી જોઈ ગઈ. તેણે ભયંકર ક્રોધ સાથે દૂતીને ધમકાવીને ગળચી પકડીને કાઢી મૂકી.
આ વાત દૂતીએ કીચકને કરી. તે પછી કીચકે દ્રૌપદીને લલચાવવાના અને ફસાવવાના અનેક નિષ્ફળ પ્રયત્નો કર્યા.
ધર્મ તો મારો સ્વભાવ છે
જૈન મહાભારત ભાગ-૨
| SR No. | 009165 |
| Book Title | Jain Mahabharat Part 02 |
| Original Sutra Author | N/A |
| Author | Chandrashekharvijay |
| Publisher | Kamal Prakashan |
| Publication Year | 2004 |
| Total Pages | 222 |
| Language | Gujarati |
| Classification | Book_Gujarati |
| File Size | 1 MB |