________________
વ્યક્તિની હાજરીમાં પણ રાગ જાય ખરો, પણ તે ક્યારે વ્યક્તિ ખરાબ છે એવો અધ્યવસાય જાગે તો. અને સર્વગુણસંપન્ન એવા વીતરાગપરમાત્મા માટે એવું તો કોઈ સંયોગોમાં બને એવું ન હતું. માટે જ ભગવાનના ગયા પછી ભગવાન પ્રત્યેનો સ્નેહરાગ પણ ગયો અને કેવળજ્ઞાન પામ્યા.
ગૌતમસ્વામી મહારાજના કેવળજ્ઞાનના આ દિવસે તેમની ત્રીસ વરસની સાધનાને યાદ કરીને આપણે આપણા પુરુષાર્થને વેગ આપવો છે. ગુણ મળે કે ન મળે, દોષનો ઢગલો ન થવો જોઈએ. આપણી ઈચ્છા મરી ગઈ છે એને તપાસવા માટેનું એક જ લિંગ બસ છે કે આપણી પ્રવૃત્તિ જ અટકી પડી
છે.
સ. એટલે ઈચ્છાને જિવાડવા માટે પણ પુરુષાર્થ ચાલુ રાખવાની જરૂર છે, એમ જ ને?
ઈચ્છાને જિવાડવા માટે નહિ પણ ઈચ્છાને જીવતી રાખવા માટે પુરુષાર્થ ચાલુ રાખવો છે. ઈચ્છાને જિવાડવાની વાત આવે એટલે જાણે બીજાની ઈચ્છાને જીવતી રાખવાની વાત લાગે. અથવા પરાણે ઈચ્છાને જીવતી રાખવાની વાત આવે. આપણે બીજાની ઈચ્છાને જિવાડવી નથી અને આપણી ઈચ્છાને પણ પરાણે નથી જિવાડવી. આપણી પોતાની ઈચ્છાને જીવતી રાખવા માટે, પુરુષાર્થ અટકી ન જાય તેની સતત કાળજી રાખવી છે. તેના માટે ઉપર જણાવ્યા મુજબ શ્રુતજ્ઞાનથી-પંદર કલાકના સ્વાધ્યાયથી-શરૂઆત કર્યા વગર નહિ ચાલે. આપણી ઈચ્છાને
