________________
ત્યારથી હવે સ્વાર્થ ન સધાવાના કારણે રાણી સૂર્યકાન્તાને તે કાંટાની જેમ ખૂંચવા લાગ્યો. પોતાનો પ્રાણપ્રિય પતિ હવે તેને ખારોઝેર લાગે છે. દુશ્મન જેવો ભાસે છે.
અને એક દિવસ રાણી સૂર્યકાન્તાએ પોતાના પતિને ભોજનમાં ઝેર આપી દીધું. સમગ્ર શરીરમાં ઝેર પ્રસરતાં અસહ્ય-અકથ્ય વેદના રાજાના શરીરમાં પેદા થઈ.
પોતાની રાણી સૂર્યકાન્તાએં ઝેર આપ્યું છે, તે સમજતા તેને જરા ય વાર ન લાગી. છતાં ય હવે ધર્મને સમજે તેવો આ ધર્માત્મા હતો. કેશીસ્વામીના સત્સંગનો પ્રભાવ તેના સમગ્ર આત્મપ્રદેશે વ્યાપેલો હતો. તેથી તેણે મનમાં જરા પણ દ્વેષ ન કર્યો.
પૌષધશાળામાં જઈ, ચારે આહારનો ત્યાગ કરીને, અરિહંતાદિ ચારનું શરણ સ્વીકારી, પોતે સ્વીકારેલા વ્રત-નિયમોને યાદ કરીને, શરીરાદિ સર્વ ઉપધિને વોસીરાવી, પોતાના દુષ્કૃતોની નિંદા અને સુકૃતોની અનુમોદના કરતો, ધર્મધ્યાનમાં લીન બનેલો તે પ્રદેશી રાજા આયુષ્ય પૂર્ણ થતાં મૃત્યુ પામીને પહેલા સૌધર્મ દેવલોકમાં સૂર્યાભ નામના વિમાનમાં ચાર પલ્યોપમના આયુષ્યવાળો દેવ બન્યો.
પ્રભુ મહાવીર દેવ પોતાની વાત આગળ ચલાવતા કહ્યું, ‘‘હે ગૌતમ ! તે પ્રદેશી રાજા સૂર્યાભદેવ બન્યા પછી, આજે મને વાંદવા આવ્યો. અને ભક્તિથી તેણે ૩૨ નાટકો કર્યા.
ગૌતમ સ્વામી : હે ભગવંત ! તે સૂર્યાભદેવ પોતાનું ચાર પલ્યોપમનું આયુષ્ય પૂર્ણ થતાં ત્યાંથી ક્યાં જન્મ લેશે ?
હે ગૌતમ ! તે સૂર્યાભદેવ પોતાનું આયુષ્ય પૂર્ણ થતાં, મહાવિદેહ ક્ષેત્રમાં ધનાઢય કુળમાં જન્મ લેશે. તેના ગર્ભમાં આવ્યાથી માતા-પિતા ધર્મમાં વધારે દૃઢ પ્રતિજ્ઞાવાળા બન્યા હોવાથી તેનું નામ દૃઢપ્રતિજ્ઞ પડશે, યૌવનકાળમાં પણ તે કામભોગોથી જરા પણ લેપાશે નહિ, કિન્તુ દીક્ષા લઈ, કેવળજ્ઞાન પામી મોક્ષપદના ભોક્તા બનશે. આત્મ સ્વરૂપમાં રમણ કરશે .
પ્રભુવીરે, સૂર્યાભદેવ સંબંધિત ગૌતમસ્વામી વડે પૂછાયેલા પ્રશ્નના જવાબમાં સૂર્યાભદેવનો પૂર્વભવ અને પછીનો ભવ જણાવ્યો. તેમાં પૂર્વભવના વર્ણનમાં કેશીસ્વામી અને પ્રદેશી રાજાના વાર્તાલાપ દ્વારા શરીરથી જુદા આત્મતત્ત્વની તાર્કિક સિદ્ધિ પણ કરી આપી.
૩૧
