Karmanu Computer Part 2 3

SR No.: 008957
Original Sutra Author: N/A
Author: Meghdarshanvijay
Publisher: Akhil Bharatiya Sanskrutirakshak Dal
Total Pages: 226
Language: Gujarati
Classification: Book_Gujarati & Karma
File Size: 5 MB

Page 92

પડે છે. જ્યારે બંધાયેલા તે આયુષ્યકર્મના તમામ દળીયા આત્માથી છૂટા પડી જાય ત્યારે તેનું મોત થાય છે.
હવે જો તે દળીયા ધીમે ધીમે ક્રમશઃ આત્માથી છૂટા પડતાં ૭૦વર્ષ લાગવાના હોય તો તેણે ૭૦ વર્ષનું કાળ આયુષ્ય બાંધ્યું તેમ પણ કહેવાય છે.
આ ૭૦ વર્ષના કાળઆયુષ્યને ધરાવનાર વ્યક્તિએ ૫૦ વર્ષની ઉંમરે આપઘાત કરવાનો પ્રયત્ન કર્યો અને જો તે મરી ગયો તો તે વખતે ભલે તેનું કાળઆયુષ્ય પૂર્ણ થયું નથી, પણ તેનું દ્રવ્ય આયુષ્ય (આયુષ્યકર્મના દળીય રૂ૫) તો પૂરેપૂરું ભોગવાઈને ખલાસ થયું જ છે. ૫૦વર્ષ સુધી ક્રમશઃ ધીરે ધીરે તેના આત્માથી આયુષ્યકર્મના કેટલાક દળીયા છૂટા પડ્યા. જે ૨૦ વર્ષ ચાલે તેટલા દળીયા હજુ ભોગવવાના બાકી રહ્યા હતા, તે આપઘાત કરતી વખતે આત્માને જે આઘાત લાગ્યો તેનાથી એકસાથે ભોગવાઈને ખરી ગયા. આમ આયુષ્યકર્મના દળીયાં તો તમામ ભોગવાઈને ખલાસ થયા.
દા. ત. ક્રમશઃ ધીમે ધીમે અનુભવતાં ૮૦ વર્ષનું કાળ આયુષ્ય પસાર કરી શકાય તેટલાં આયુષ્ય કર્મનાદળીયાં (દ્રવ્ય આયુષ્યકમી બાંધીને આવેલા શાંતિભાઈને ૬૦મા વર્ષે એટેક આવ્યો. ધીમે ધીમે અનુભવતાં ૧૫ વર્ષ પસાર થાય તેટલાં દળીયા એક જ ઝાટકે અનુભવીને ભોગવાઈ ગયા. તરત હોસ્પીટલમાં ટ્રીટમેન્ટ કરતાં બચી ગયા. કારણ કે પાંચ વર્ષ ભોગવી શકાય તેટલાં દળીયા હજુ આત્મા ઉપર ચોટેલા બાકી છે.
તે ભાઈ શરીરની ઘણી કાળજી લઈ રહ્યા છે. છતાં છ મહીના ગયા પછી ફરીથી એટેક આવ્યો. ત્રણ વર્ષ ભોગવાય તેટલાં દલિક ખરી ગયા. બીજા છ મહીના પસાર થતાં છેલ્લો એટેક આવ્યો. એક વર્ષ ભોગવાય તેટલાં બાકી રહેલાં તમામ દલિકો એકી સાથે ભોગવાઈને ખલાસ થતાં તેઓ મૃત્યુ પામ્યા.
આમ ૬૧ વર્ષની ઉંમરે તેઓ મૃત્યુ પામતાં પૂરા ૮૦ વર્ષનું કાળ આયુષ્ય તેઓએ ન ભોગવ્યું. તેઓ એટેકના કારણે અકાળે મરી ગયા, તેમ કહી શકાય. પણ (આયુષ્ય કર્મનાદળીયારૂપ) દ્રવ્ય આયુષ્ય તો તેમણે પૂરેપૂરું ભોગવી જ લીધું છે. તે જરા ય બાકી નથી કે જે બીજા ભવમાં ભોગવવું પડે !
જે દળીયાને ક્રમશઃ ભોગવતાં પાંચ - સાત - દસ વર્ષ લાગે તે દળીયાં એકી સાથે ભોગવાઈને શી રીતે ખલાસ થાય? તેવો સવાલ ઊઠે; તે સહજ છે. પણ તેનું સમાધાન તો આપણે સૌ અનેક પ્રસંગોમાં અનુભવીએ છીએ.
એક માટલું પાણીથી ભરેલું છે. તેમાંથી ટપ........ ટપ.... ટપ.... પાણી ટપકે છે. આ રીતે તો તે માટલું ખાલી થતાં બે દિવસ લાગે. પણ જો કોઈ વ્યક્તિ એક પથ્થરનો ઘા મારીને તે માટલું ફોડી નાંખે તો તરત જ ખાલી થઈ જાય ને?