________________
થયું. પરમાત્માની વાતને ખોટી પાડવાનો પ્રયત્ન તેણે કર્યો...મળી સરિયામ નિષ્ફળતા.
પરમાત્મા મલ્લિનાથના આત્મા ઉપર પૂર્વના કોઈક ભવમાં આ કર્મે એવો હુમલો કર્યો કે જેથી તેમની સ્વચ્છ બુદ્ધિ માયાથી કલુષિત બની ગઈ. તીર્થંકરના ભવમાં પણ સ્ત્રીનો અવતાર તેમણે લેવો પડ્યો !
આ મોહનીયકર્મનો હુમલો તો ખૂબ ભયંકર. તે તો જીવને બુદ્ધિભ્રષ્ટ કરીને પાપી બનાવે. કામાન્ય, ક્રોધાન્ય, મોહાન્ધ કે સત્તાન્ય બનાવે.
હુમલા તો બંને ય ખરાબ. સુખી જીવને સુખભ્રષ્ટ કરીને દુઃખી બનાવતો વેદનીય કર્મનો હુમલો ય સારો નથી કે ધર્મી જીવને બુદ્ધિભ્રષ્ટ કરીને પાપી બનાવતો મોહનીય કર્મનો હુમલો ય સારો નથી.
પણ હુમલો થવો જ હોય તો પહેલો થાઓ, બીજો તો કદાપિ નહિ; જે આપણને બુદ્ધિભ્રષ્ટ કરે. પહેલા હુમલા દ્વારા સુખીએ સુખભ્રષ્ટ થઈને દુઃખી થવું હજુ સારું; પણ તેણે બુદ્ધિભ્રષ્ટ થઈને પાપી થવું; તે તો ખૂબ ખરાબ ! તે તો કદીય ઇચ્છનીય નહિ.
દુઃખી તો પોતાને જ મુશ્કેલીમાં મૂકે.
પાપી બિચારો ! અનેકોને પાયમાલ કરે.
ધર્મી રહેવા સાથે દુઃખી બનવું હજુય સારું. પણ સુખી રહેવા સાથે પાપી બનવું તો ખૂબ જ ખરાબ.
પાપી પણ છેવટે દુઃખી બન્યા વિના તો રહેવાનો જ નહિ. પાપકર્મનો ઉદય થતાં જ તે જીવ દુર્ગતિના દુઃખોના દાવાનળમાં અથડાવાનો જ.
માટે જ વેદનીયકર્મથી એટલા ગભરાવા જેવું નથી, જેટલું મોહનીયકર્મથી ગભરાવાનું છે.
આઠે કર્મોનો રીંગ માસ્ટર આ મોહનીયકર્મ છે. જેણે મોહનીયને ખતમ કર્યું, તેણે હવે કાંઈ જ ખતમ કરવાનું બાકી રહેતું નથી, એમ કહીએ તો ય ચાલે.
માટે તો તમામ તીર્થંકર દેવોએ કેવળજ્ઞાન મેળવવાની સાધના નથી કરી પણ મોહનીય કર્મને ખતમ કરવાની સાધના કરી છે. ૧૦મા ગુણસ્થાનકે મોહનીયકર્મને ખતમ કરતાં, અંતર્મુહૂર્તમાં ધર્મસત્તાએ તેમને કેવળજ્ઞાનની ભેટ ધરી છે. એક જ ઉપદેશ છે પરમાત્માનો કે, ‘‘મોહનીયકર્મ ખતમ કરો.”
૯૪
કર્મનું કમ્પ્યુટર
