________________
સાચું કહું તને ? તું જ્યાં પણ જાય છે ત્યાં તારા મનમાં પ્રસંગનું મહત્ત્વ એટલું બેઠું નથી હોતું જેટલું તારી હાજરીની નોંધ લેવાતી રહે એનું હોય છે ! આનો અર્થ એટલો જ છે કે તું પ્રસંગ સાચવવા નથી જતો પરંતુ તારો અહં પુષ્ટ કરવા જ જાય છે.
આ સંદર્ભમાં એક મહત્ત્વની વાત તને જણાવું ? તું જ્યાં પણ જાય ત્યાં તારી હાજરીની નોંધ લેવાય એવી ઝંખના રાખવાને બદલે તારી ગેરહાજરી અનુભવાય એવું જીવન જીવવા લાગ. તને સમજાય એવી ભાષામાં કહું તો તું સાકર જેવો બની જા. દૂધમાં સાકર હોય છે ત્યારે એની હાજરીની નોંધ કદાચ કોઈ નથી લેતું પણ એ ગેરહાજર હોય છે ત્યારે એની ગેરહાજરી સહુ કોઈ ને ખટકતી હોય છે.
શું કહું તને ? હાજર હોય ત્યારે ખટકે એવા વિષ્ટા જેવા બન્યા રહેવાને બદલે ગેરહાજર હોય ત્યારે ખટકે એવા સાકર જેવા બન્યા રહેવામાં જ જીવનની સફળતા છે.
e
