________________
ઉંમરને કારણે તેઓ બધી સાંસારિક જાળમાંથી છૂટા થવા ઇચ્છે છે. પરંતુ તેમના ગુરુદેવ સંતબાલજીની એવી અમૂલ્ય ભેટો તેમની પાસે છે જે બીજા કોઈ પાસે હોવાનો સંભવ નથી, એવું તે શું છે ? તેમ મેં પૂછ્યું. ત્યારે આ ડાયરીઓ તથા તેમણે મુનિશ્રીની વખતોવખત વીડીઓ અને ઓડીઓ કેસેટ લીધી છે તેની વાત મને કરી. મને થયું કે મુનિશ્રીના અનુયાયીઓ માટે જ ફક્ત નહિ પરંતુ જૈનજૈનેતર આમપ્રજા માટે પણ આ સાહિત્ય ઘણું અગત્યનું થાય તેમ છે. તેથી મેં તેમને કહ્યું કે આ ડાયરીઓમાં ઘણી અંગત હકીકતો આવતી હશે, એટલે સામાજિક ઉપયોગિતાની હકીકતો અને તે અંગે મુનિશ્રીના વિચારો તેમાંથી તારવીને છપાવો તો જાહેર હિતનું એક સુંદર કામ થશે. તે જ રીતે ઓડીઓ-વિડીઓ રેકર્ડનું યોગ્ય અનુબંધ થઈ શકે તો એક “મુવીની ઢબે મુનિશ્રીના વિચારોની રજૂઆત થાય. તેઓને આ વિચાર તો ગમ્યો પરંતુ મને કહે કે આઠ વર્ષની આઠ ડાયરીઓનું લખાણ એટલું વિસ્તૃત છે કે તેમાંથી સમાજ ઉપયોગી વાતોનું તારણ કાઢવું તેમના માટે અતિ મુશ્કેલ છે, અને હવે તે પ્રકારની તેમની શારીરિક શક્તિ પણ નથી, તેથી કોઈ બીજા કરી આપે તો થાય. અંગત ડાયરી કોઈ બીજાના હાથમાં જાય તે ઠીક નહિ. તેથી શું કરવું તે પ્રશ્ન ઊભો થયો. મારામાં તેમને વિશ્વાસ હશે, તેથી કહે મામા, તમો આ કામ હાથમાં લો, નહિ તો આ સાહિત્ય જે બીજે અલભ્ય છે, અને જેની અંદર આઠ વર્ષ દરમ્યાન ગુરુ-શિષ્યનાં ચિંતન ભરાયેલાં છે તે નકામાં જશે.
મને દલીલ વાજબી લાગી અને તેથી ડાયરીમાંનાં જે લખાણો સામાજિક દૃષ્ટિએ બધાને ઉપયોગી જણાય તે જુદાં તારવવા માટે લાલ શાહીથી માર્ક કરવા હું કબૂલ થયો. તે કામ પૂરું થયું એટલે પ્રશ્ન આવ્યો કે આવા માર્ક કરેલ લખાણોને ડાયરીઓમાંથી કાઢી જુદાં લખવાં જોઈએ. તે કામ કોણ કરે ? તે કામ બલવંતભાઈએ અને મેં અર્ધ અર્થે વહેંચી લીધું, જેને પરિણામે આ પુસ્તક બહાર પડી શક્યું.
મહારાજશ્રીને વધુ સારી રીતે કોઈ સમજી શક્યું હોય તો તે શ્રી અંબુભાઈ, જેમણે પોતાનું સારુંય જીવન સંતબાલજીના આદર્શોને મૂર્તિમંત કરવાના પ્રયત્નોમાં ગાળ્યું છે. તેમને અમારા આ પ્રયત્નોની જાણ કરી તેઓ તેનું મહત્ત્વ તુરત સમજી ગયા અને આ પુસ્તકના પ્રકાશનમાં પૂરો સાથ આપવાનું માથે લીધું. આઠે ડાયરીમાંથી તારવેલ લખાણ વિષયબદ્ધ ન હોય તો કયા વિષય ઉપર મુનિશ્રીએ શું કહ્યું છે તે જાણવું મુશ્કેલ થાય. આથી મારી આવડત મુજબ મેં વિષયો બાંધી આપ્યા અને શ્રી
