________________
re
સાથે વરાવવાની ઠેઠ અમદાવાદ આવી હેમાભાઈ પાસે વિનંતી કરી. ઓધવજીભાઈના પ્રેમભર્યા આગ્રહે હેમાભાઈને મૌની બનાવ્યા. તે કશોય પ્રત્યુત્તર ન વાળી શક્યા.
ઓધવજી શાહ શ્રીફળ આપી ચાલતા થયા. થોડાજ સમયમાં આ બધું પતી ગયું. હેમાભાઈએ લોંકાશાહને બોલાવી પોતાની બધી પરિસ્થિતિથી તેમને વાકેફ કર્યા. વિનીત પુત્ર લોંકાશાહ કશુંયે ન બોલ્યો. પરંતુ એના વદન પર વિરક્તિના ભાવ વાંચી શકાતા હતા. તેનું માનસમંથન ઊંડાણમાં અવગાહન કરતું હતું. તેને આ વાતથી હર્ષ પણ ન થયો તેમ ખેદ પણ ન થયો. વય સામાન્ય છતાં તેની ગંભીર અને શાંત મુખાકૃતિ જુગજુગ જૂની અનુભવની સાક્ષી પૂરતી હતી.
થોડાજ સમય પછી હેમાભાઈ શાહના એકના એક પુત્ર લોંકાશાહનાં ખૂબ ઠાઠમાઠથી દબદબા ભરી રીતે લગ્ન થયાં. એ સંવત ૧૪૯૭ની સાલે યુક્તયોગી લોંકાશાહ ભુક્તભોગી બન્યા. જનકવિદેહીની જેમ માયા અને મોહમાં વસવા છતાં નિર્માયી અને નિર્મોહી જીવન ગાળવા લાગ્યા. સુદર્શના સાથે તેમનું લગ્નજીવન કેવલ દેહલગ્નરૂપે જ નહિ પરંતુ સાથે સાથે આત્મલગ્નરૂપે પણ પરિણમવા લાગ્યું.
પુત્રપ્રાપ્તિ
કાળાનુક્રમે દમ્પતિજીવનમાં સુખદ સહચારની સ્મૃતિરૂપે તેમને ત્યાં પણ એક પુત્રરત્નની પ્રાપ્તિ થઈ. શાહ હેમાભાઈને એ સમયે સંવત ૧૪૮૨ની કાર્તિકી પૂર્ણિમાનો ચંદ્ર સાંભરી આવ્યો. એ સ્મૃતિના સ્મારકરૂપે આ વીર લોંકાશાહના વીરપુત્રનું નામ રાખવામાં આવ્યું પૂર્ણચંદ્ર કે પૂનમચંદ્ર.
ગૃહસ્થજીવન
લોકાશાહનું ગૃહસ્થ-જીવન બંને રીતે વિકસ્યું જતું હતું. યૌવનની અસર ભિન્નભિન્ન રીતે પલટા માર્યે જતી હતી. લોકાશાહ હવે તો પોતાના પિતાને સ્થાને પહોંચી ગયા હતા. બુદ્ધિચાતુર્ય, ઉચ્ચ પ્રકારનું નૈતિક જીવન અને રાજ્યનીતિજ્ઞતાથી તે પોતાના સ્થાનનો ઉત્તરોત્તર વિકાસ કર્યે જતા હતા. અનુકંપા, વ્યવહારદક્ષતા અને પ્રભાવ એ ત્રિપુટીથી તેણે પ્રજાવર્ગનો ખૂબ ચાહ મેળવ્યો હતો. જાતિમાં તો તેનું સ્થાન પિતાના વખતથી જ ઉચ્ચ કોટિનું હતું.
ધર્મપ્રાણ ઃ લોકાશાહ
:
