________________
તા. ૨૪-૧૨-૧૯૫૧ : કુંડળ
ખાંભડાથી નીકળી બેલા આવ્યા. અંતર બે માઈલ હશે. ઉતારામાં સભા થઈ. સાંજના બેલાથી કુંડળ આવ્યા. અંતર અઢી માઈલ ઉતારો દરબારી ઉતારામાં રાખ્યો. રાત્રે જાહેરસભા થઈ. તા. ૨૫ થી ૨૭-૧૨-૧૯૫૧ : બરવાળા
કુંડળથી નીકળી બરવાળા આવ્યા. અંતર બે માઈલ હશે. ઉતારો ઉપાશ્રયમાં રાખ્યો. રાત્રે જાહેરસભામાં લોકો મોટી સંખ્યામાં આવ્યા હતા. બીજે દિવસે સવારના મુસલમાનોની સભા રાખી હતી. બપોરના વિદ્યાર્થીઓની સભા રાખી હતી. એક દિવસ હરિજનવાસમાં સભા રાખી હતી. ત્રણ રાત્રિસભા થઈ. તેમાં મહારાજશ્રીએ ધર્મ અને રાજકારણનો સંબંધ સારી રીતે સમજાવ્યો હતો. તા. ૨૮-૧૨-૧૯૫૧ : રોજિત
બરવાળાથી રોજિત આવ્યા. અંતર ત્રણ માઈલ હશે. ઉતારો ઉપાશ્રયમાં રાખ્યો હતો. અહીં સૌરાષ્ટ્રના મુખ્ય પ્રધાન શ્રી ઉછરંગરાય ઢેબર મળવા આવ્યા હતા. રાત્રિ સભામાં ગોરાસુના વશ્રામભાઈ તથા કરસનભાઈ, ભડિયાદના ડૉક્ટર વગેરે આવેલા. સભા પૂરી થયા પછી ડૉક્ટરે બે શબ્દ બોલવા દેવા મહારાજશ્રી પાસે માગણી કરી. મહારાજશ્રીએ સહજ સૂચન કર્યું કે વિતંડાવાદ ના થાય એ જોજો. અને દશ મિનિટમાં પૂરું કરજો. તેઓ બોલવા ઊભા થયા. કુરેશીભાઈ ધંધૂકાના વતની નથી. વગેરે કહ્યું. પછી મહારાજશ્રીએ જવાબ આપવા માંડ્યો. એટલે એ લોકોને લાગ્યું કે અમને બોલવા દેવા નથી માગતા. એટલે જ ચાલતા થયા. બેચાર બીજા ભાઈઓ પણ સાથે ગયા. તેમનો હેતુ કદાચ સભા તોડવાનો હશે. પણ ગામ સંપીલુ અને કૉંગ્રેસ તરફી હોવાથી કંઈ વળ્યું નહિ. તા. ૨૯-૧૨-૧૯૫૧ : પોલારપુર
રોજિતથી નીકળી પોલારપુર આવ્યા. અંતર ત્રણ માઈલ હશે. ઉતારો નિશાળમાં રાખ્યો હતો. અહીંથી નજીક ભીમનાથની પ્રખ્યાત જગ્યા છે. ત્યાં બાર વર્ષે મોટો મેળો ભરાય છે. જૂના વખતનું મહાદેવનું મંદિર છે. અને ઝાર નામનું એક જૂનું મોટું વૃક્ષ છે.
સાધુતાની પગદંડી
૩૮
