________________
સાંજના ઢેબરભાઈ મળ્યા. તેમને ગઈકાલના પ્રસંગ અંગે દુઃખ થયું હતું. પછી કલેક્ટર શ્રી બૂચ, મહારાજશ્રીને મળી ગયા અને પોલીસ તરફની હકીકત જણાવી. રાત્રે વજુભાઈ આવ્યા હતા.
આજે લાઠીમારથી થયેલા દુ:ખના કારણે મહારાજશ્રીએ ઉપવાસ કરેલો. માલિયા આજે આવ્યા હતા.
તા. ૨૫-૧-૧૯૫૩
આજે કનુ ગાંધી, પુરુષોત્તમભાઈ ગાંધી વગેરે મહારાજશ્રીને મળવા આવ્યા હતા. ગામમાં શાંતિ હતી. એટલે ફરવાનું બંધ રાખ્યું હતું. આજે ગિરધરભાઈ કોટક અને જેઠાલાલ જોશી મહારાજશ્રીને મળવા આવ્યા હતા. કેટલીક વાતો થઈ.
તા. ૨૬ની રાત્રે બારટન ગર્લ્સ કૉલેજનાં ઘણા બહેનો આવ્યાં હતાં. મહારાજશ્રીએ આજે સ્ત્રીનું સ્થાન એ વિષય ઉપર સુંદર ચર્ચા કરી હતી.
તા. ૨૭-૧-૧૯૫૩
સવારના અમે અને કનુભાઈ ગામમાં ફરવા નીકળ્યા. સાબરમતીના એક ભાઈને ત્યાંથી ભિક્ષા લઈ મહારાજશ્રીના સંસારી માસીબાને ત્યાં જવા નીકળ્યા. રસ્તામાં એક ભાઈએ ખબર આપ્યા કે, વેચાણવેરા વિરોધમાં જે બાઈએ ઉપવાસ કર્યા હતા તે ગુજરી ગઈ. મહારાજશ્રીને એનો આંચકો લાગ્યો. અને પછી ગોચરી લેવાનું બંધ કર્યું. લીધી હતી. તે પણ પરઠવી દીધી. ત્યાંથી ચંપાબેન મહેતાને ત્યાં રોકાઈ માસીબાને ત્યાં ગયા. અહીં મામા મગનભાઈ, ધનાભાઈ, ખુશાલભાઈ અને બીજા સંબંધીઓ એકઠાં થયાં. બધાની એક વાત હતી કે આપે આ વાતમાં ના પડવું જોઈએ. આપને લોકો ભરમાવી જાય છે. સરકાર જાણી જોઈને જૂઠું અને હિંસા કરાવે છે વગેરે કહ્યું. મહારાજશ્રીએ પોતાનું દૃષ્ટિબિંદુ સમજાવ્યું. અને ગઈ વાતોનો ખુલાસો કર્યો અને કહ્યું, તમને શરીરની ચિંતા થાય છે. પ્રતિષ્ઠા જાય તેની ચિંતા થાય છે પણ તે બધા કરતાં સિદ્ધાંત મોટો છે. જેના પક્ષે ન્યાય અને સત્ય હશે તેને મારો ટેકો હશે. ભૂલ કરશે તે સૌને કહીશ. આમ તેમના સંસારી કુટુંબીજનોને સમાધાન આપવા પ્રયત્ન કર્યો.
૧૩૦
સાધુતાની પગદંડી
